რუსეთისა და ჩინეთის დახმარება იტალიას: პიარი თუ კეთილშობილური მოქმედება

0
86

იტალია, კორონავირუსთან ბრძოლაში გაწეული დახმარებისთვის, რუსეთს და ჩინეთს ემადლიერება, ევროკავშირის მოქმედებით კი უკმაყოფილოა. „დოიჩე ველე“ შეეცადა გაერკვია, თუ ვინ, როგორ და რატომ ეხმარება „კოვიდ-19“-ით დასნებოვნებულ ევროპულ ქვეყანას.

——————-

მოსკოვი და პეკინი რომს სასიკვდილო კორონავირუსის ეპიდემიასთან ბრძოლაში დახმარებას უწევენ, ევროკავშირის წევრმა სახელმწიფოებმა კი „კოვიდ-19“-საგან ყველაზე მეტად დაზარალებული იტალია თითქმის ბედის ანაბარად მიატოვეს. ასეთი შთაბეჭდილება იქმნება, თუ იტალიელი პოლიტიკოსების განცხადებებს თვალს მივადევნებთ. იბადება კითხვა: რამდენად შეესაბამება სინამდვილეს მოარული ხმები და რას ამბობენ რუსეთისა და ჩინეთის მიერ გაწეული დახმარების შესახებ?

ევროკავშირი ყველანაირ დახმარებას მიესალმება…

რუსეთმა 22-23 მარტს იტალიაში სამხედრო-სატვირთო თვითმფრინავებით ვირუსისგან დაცვის საშუალებები, ტრანსპორტის აეროზოლური დეზინფექციის მობილური კომპლექსები და სპეციალისტთა ბრიგადები მიავლინა. ჯერ კიდევ მარტის შუახანებში რომში პეკინიდან ორი თვითმფრინავი ჩაფრინდა და თან სამედიცინო მოწყობილობები და ჩინელი მედექსპერტები ჩაიყვანა. „ჩვენ ყველანაირ დახმარებას მივესალმებით“, – განუცხადა „დოიჩე ველეს“ ევროპის კავშირის უმაღლესმა წარმომადგენელმა საგარეოპოლიტიკურ საკითხებში ჯოზეფ ბორელმა. მან ჟურნალისტთან საუბრის დროს გაიხსენა, რომ ჯერ კიდევ მაშინ, როცა ჩინეთი ვირუსით დასნებოვნებული ერთადერთი ქვეყანა იყო, ევროკავშირმა პეკინს 50 ტონამდე სამედიცინო ტექნიკა გაუგზავნა: „იმ დროს ჩვენ რესურსები გვქონდა და ჩინეთს ვეხმარებოდით“. ახლა კი, როცა „კოვიდ-19“-ით დაავადების ეპიცენტრმა ევროპაში გადმოინაცვლა, ჯოზეფ ბორელის თქმით, ჩინეთს უკვე აქვს შესაძლებლობა საპასუხო დახმარება განახორციელოს.

„იმ საგანგებო სიტუაციაში, როგორშიც ჩვენ აღმოვჩნდით კორონავირუსის გავრცელების გამო, ვაფასებთ ყველანაირ მხარდაჭერას – როგორც ევროპიდან, ასევე მის ფარგლებს გარედან“, – უთხრა „დოიჩე ველეს“ ჟურნალისტს ევროდეპუტატმა, იტალიელმა სოციალ-დემოკრატმა  ელისაბედ გუალმინმა, – „ჩინელი ექიმების მიერ მოტანილი სამედიცინო ხელსაწყოები ახლა ძალიან გვჭირდება. ამიტომაც ჩვენ ამ დახმარებას უპირველეს ყოვლისა, მოსახლეობისადმი გაწეულ დახმარებად ვთვლით“.

რუსული დახმარების ფარული მოტივები

იმავდროულად „დოიჩე ველე“-სთან მოსაუბრეები აღნიშნავენ, რომ იტალიისათვის გაწეული დახმარებით, მოსკოვი და პეკინი მხოლოდ ჰუმანიტარული მოსაზრებით არ ხელმძღვანელობენ. „ისეთ ქვეყნებს, როგორებიც რუსეთი და ჩინეთი არიან, მათ ყოველთვის პოლიტიკური ინტერესები ამოძრავებთ“, – ამბობს ელისაბედ გუალმინი. იგი უშვებს იმის შესაძლებლობას, რომ რუსეთი ამგვარი მოქმედებით ცდილობს ევროკავშირთან ურთიერთობა გაიუმჯობესოს. ევროპის სახალხო პარტიის ევროდეპუტატი მიხაელ გალერი დარწმუნებულია, რომ ვლადიმერ პუტინი, იტალიისადმი დახმარებით, საგარეოპოლიტიკურ მიზნებს ისრულებს: „რუსეთის ლიდერს იმედი აქვს, რომ როცა ანტირუსული ეკონომიკური სანქციების გაგრძელების დრო მოვა, იტალია მას ვეტოს დაადებს“.

„თვალებში მტვრის შეყრის“ მცდელობას ხედავს რუსეთის მოქმედებაში პოლიტოლოგი სვენ ბისკოპი საერთაშორისო ურთიერთობების კვლევის ბელგიის სამეფო ინსტიტუტიდან: „რუსეთი დღემდე ისე იქცევა, თითქოსდა მას ვირუსთან დაკავშირებით მნიშვნელოვანი პრობლემა არ აქვს. იტალიისათვის გაწეული დახმარებით მოსკოვი ცდილობს აჩვენოს თავის მოქალაქეებს, რომ თვით რუსეთისათვის კორონავირუსი პრობლემას არ წარმოდგენს“. ექსპერტი ვარაუდობს, რომ რუსეთის ხელისუფლება სცდება: „ყველაზე უარესი, რაც შეიძლება დღეს გააკეთო, ესაა მიიღო ისეთი სახე, თითქოსდა ეპიდემია შენ არ გეხება და არავითარი ზომა არ განახორციელო“, – ხაზს უსვამს სვენ ბისკოპი.

ჩინეთი თავისი რეპუტაციის აღდგენას იწყებს.

იტალიისათვის გაწეულ დახმარებაში ევროპელი პოლიტიკოსებისათვის შედარებით უფრო ნათელია პეკინის მოტივები: „ჩინეთი სერიოზულად მუშაობს იმაზე, რომ თავისი შელახული იმიჯი როგორმე „გაათეთროს“, – აღნიშნავს ელისაბედ გუალმინი და იხსენებს, რომ ჩინეთის სახალხო რესპუბლიკის ხელისუფლებამ საკმაოდ დაყოვნებით მოახდინა რეაგირება კორონავირუსის გავრცელებაზე. სწორედ პეკინის დაგვიანებული რეაქციის გამო გადაიზარდა ადგილობრივი ინფექცია გლობალურ პანდემიაში.

„ის, თუ როგორ უხდიან მადლობას დახმარებისთვის ჩინეთს იტალიელები და ევროპის სხვა ქვეყნის მოსახლეობა – არის სიგნალი ჩინეთის მოქალაქეებისთვისაც“, – დარწმუნებულია სვენ ბისკოპი. მისი აზრით, ასეთი სახით პეკინი ცდილობს წარმოაჩინოს, თუ როგორ კარგად უმკლავდება სიტუაციას, თანაც ამ დროს ევროპის დახმარებაც კი შეუძლია. „ალბათ, ხელისუფლების ასეთი პოლიტიკა ჩინეთში იმუშავებს, შიდა აუდიტორიისათვის, მაგრამ ვფიქრობ, ევროპა არ დაივიწყებს იმას, თუ როგორ ცდილობდა ვირუსის პრობლემის დამალვას პეკინი, სანამ ინფექცია კონტროლიდან არ გამოვიდა“, – ამბობს ბელგიელი პოლიტოლოგი.

ევროკავშირის დახმარება იტალიისადმი

[შესაძლოა ბევრმა არ იცის, მაგრამ] კორონავირუსთან ბრძოლის დროს ევროკავშირი იტალიისაგან გვერდზე არ გამდგარა: ჯერ კიდევ თებერვალში დაავადების კონტროლისა და პროფილაქტიკის ევროპულმა ცენტრმა (ECDC), ჯანდაცვის მსოფლიო ორგანიზაციასთან ერთად, იტალიაში სპეციალური მისია გაგზავნა, ადგილობრივი ხელისუფლებისათვის კონსულტაციის გაწევის მიზნით. მაგრამ მაშინ, როცა ადგილობრივი მასმედია ჩინელი სპეციალისტების შესახებ ბევრს წერდა, ECDC-ის მისიაზე ვერავინ ვერანაირ ინფორმაციას პრაქტიკულად ვერ იპოვიდა.

კომუნიკაციის პრობლემებზე ისაუბრა ჯოზეფ ბორელმა 23 მარტს ევროკავშირის ქვეყნების საგარეო საქმეთა მინისტრებთან გამართულ ვიდეოკონფერენციის დროს: „დღეს ჩვენ მოვილაპარაკეთ, რომ აქტიურად გავავარცელებთ ინფორმაციას ჩვენს მიერ გაკეთებული საქმეების შესახებ. ჩვენ ძალიან ბვერს ვმუშაობთ, მაგრამ ამას ვერავინ ამჩნევს. ზოგიერთი ქვეყანა ჩივის, რომ მათ არავინ არ ეხმარება“.

ბევრი ევროპელის უკმაყოფილება გამოიწვია, მაგალითად, იმ ცნობამ, რომ გერმანიამ და საფრანგეთმა სხვა ქვეყნებში თავიანთი წარმოების ინდივიდუალური დაცვის საშუალებების ექსპორტი აკრძალეს, თანაც იმ დროს ყველაზე დაზარალებულ ქვეყნად უკვე იტალია მიიჩნეოდა. მართალია, მოგვიანებით აკრზალვა მოიხსნა, მაგრამ ის ფაქტი, რომ ევროკავშირის წევრი ქვეყნები პირველ რიგში საკუთარ თავზე ფიქრობდნენ, ბევრმა დაიმახსოვრა. „ჩვენ რომ ერთმანეთთან ნამდვილი და გულწრფელი თანამშრომლობა გვქონოდა, ვერავინ დაიწყებდა სპეკულაციას იტალიისადმი რუსეთ-ჩინეთის დახმარების თაობაზე, გეოპოლიტიკური სარჩულით“, – აღნიშნავს გერმანელი ევროდეპუტატი ჰენრიკე ხანი „მწვანეთა“ ფრაქციიდან.

მაგრამ ფაქტია, რომ ევროკავშირმა საკმაოდ ბვერი გააკეთა, მათ შორის იმ საკითხშიც, რომ ევროპული ეკონომიკა არ ჩაძირულა. ჯერ კიდევ თებერვალში ევროკომისიამ დაიწყო ინდივიდუალური დაცვის საშუალებების ცენტრალიზებული შესყიდვა. მართალია, პირველი მცდელობა დროში საკმაო ხანს გაჭიანურდა: კრიტიკის ცეცხლის ქვეშ აღმოჩნდა ევროპის ცენტრალური ბანკიც, რომელმაც მხოლოდ ახლახან, 19 მარტს გამოაცხადა ეკონომიკის მხარდაჭერის პროგრამა, 750 მილიარდი ევროს მოცულობით.

„როცა იტალიაში პანდემია დაიწყო, ჩვენ ძალიან იმედგაცრუებულნი ვიყავით ევროკომისიის დაყოვნებული მოქმედებით და ფრთხილი ზომებით, კორონავირუსის წინააღმდეგ ბრძოლაში“, – აღნიშნავს ელისაბედ გუალმინი, – მაგრამ ახლა სიტუაცია შეიცვალა: ევროცენტრბანკის ბოლო გადაწყვეტილება და ევროკავშირის მიერ წევრი ქვეყნების სახელმწიფო ბიუჯეტების დეფიციტზე აკრძალვის გაუქმება იმას მოწმობს, რომ „ევროკავშირი, როგორც იქნა გამოფხიზლდა“.

მოამზადა სიმონ კილაძემ

წყარო: https://p.dw.com/p/3Zyow

LEAVE A REPLY

Please enter your comment!
Please enter your name here