რომის პაპმა ლეო XIV-მ რუსეთსა და უკრაინას მოუწოდა, დაიწყონ მოლაპარაკებები ომის დასასრულებლად.

აღნიშნული განცხადება პონტიფიკოსმა ხუთშაბათს, 25 დეკემბერს, ტრადიციული საშობაო მიმართვის Urbi et Orbi („ქალაქსა და მსოფლიოს“) ფარგლებში გააკეთა.

„ჩვენ ვლოცულობთ უკრაინის ტანჯული ხალხისთვის: დაე, შეწყდეს იარაღის გრუხუნი. დაე, ჩართულმა მხარეებმა, საერთაშორისო თანამეგობრობის მხარდაჭერით, გამონახონ საკუთარ თავში ძალა გულწრფელი, პირდაპირი და ღირსეული დიალოგისთვის“, - განაცხადა პონტიფიკოსმა.

თავის გამოსვლაში პონტიფიკოსმა ხაზი გაუსვა საერთაშორისო მხარდაჭერის მნიშვნელობას მშვიდობის დამყარების პროცესში და მხარეებს სიმამაცისკენ მოუწოდა, რათა იარაღის ნაცვლად დიპლომატიის გზას აირჩიონ.