კულტურის სამინისტროსა და „შემოქმედებითი საქართველოს“ ფინანსური მხარდაჭერით საქართველოში ახალი საბავშვო ანიმაციური პროექტი — „ლილის შოუ“ იწყება.
„ლილის შოუ“ 2D ანიმაციური სერიალია, რომელიც სკოლამდელი და დაწყებითი კლასების ასაკის ბავშვებისთვისაა შექმნილი. თითოეული ეპიზოდის ხანგრძლივობა 3-5 წუთია. სერიალის მთავარი გმირი პატარა მარტორქა ლილია. ის მეგობრებთან ერთად ყოველდღიურ გამოწვევებს ხვდება და მათი გადაჭრის გზებს ეძებს. პრობლემების მოგვარებაში ლილისა და მის მეგობრებს ხშირად მშობლები და უფროსებიც ეხმარებიან.
სერიალში განსაკუთრებული ყურადღება ეთმობა ბავშვებისთვის მნიშვნელოვან თემებს — მეგობრობას, თანადგომას, გულწრფელობას, ერთმანეთის პატივისცემას, პასუხისმგებლობასა და პრობლემების მშვიდობიანი გზით გადაჭრას. პროექტის მიზანია ისეთი საბავშვო კონტენტის შექმნა, რომელიც ერთდროულად იქნება საინტერესო და გასართობი, ამასთანავე ხელს შეუწყობს ბავშვებში სოციალური უნარების განვითარებას.
პროექტის ავტორების შეფასებით, ქართულ აუდიტორიაში მზარდია მოთხოვნა საბავშვო პროდუქტზე, რომელიც ბავშვებისთვის ნაცნობ და საინტერესო ფორმატში მათ ასაკზე მორგებულ საგანმანათლებლო და შემეცნებით შინაარსს შესთავაზებს.
პროექტის მთავარი პარტნიორია SILKMEDIA/SILKTV, რომელიც უზრუნველყოფს სერიალის შექმნისთვის საჭირო ტექნიკურ რესურსს. პარტნიორობა ასევე მოიცავს პროექტის მუდმივ გაშუქებას SILKTV-ის ტელეარხებზე, რაც სერიალის ფართო აუდიტორიამდე მისვლასა და მის პოპულარიზაციას შეუწყობს ხელს.
„ლილის შოუ“ მხოლოდ ერთჯერადი შემოქმედებითი პროექტი არ არის. მისი გრძელვადიანი ფორმატი ქმნის შესაძლებლობას, რომ პროექტის ფარგლებში პერმანენტულად დასაქმდნენ ახალგაზრდა ანიმატორები, მსახიობები, მხატვრები და ტექნიკური მიმართულების სპეციალისტები, რაც ქართული ანიმაციისა და კრეატიული ინდუსტრიების განვითარების პროცესს დამატებით სტიმულს მისცემს.
კულტურის სამინისტროსა და „შემოქმედებითი საქართველოს“ მხარდაჭერა სწორედ იმ პროექტების განვითარებას ემსახურება, რომლებიც ქმნის ახალ ქართულ კულტურულ პროდუქტს, აძლიერებს შემოქმედებით ინდუსტრიებს და ადგილობრივ პროფესიონალებს საკუთარი იდეების განხორციელების შესაძლებლობას აძლევს.
„ლილის შოუ“ ამ პროცესის ერთ-ერთი მაგალითია — ქართული საბავშვო ანიმაციის შექმნის მცდელობა, რომელიც ბავშვებისთვის საინტერესო ისტორიებს, თანამედროვე ვიზუალურ ენასა და სწორ ღირებულებებს აერთიანებს.
0
0
