ნატო-ს ქვეყნები კალინინგრადის რეგიონის იზოლირებას თუ შეეცდებიან, რუსეთი მზად იქნება, გამოიყენოს თავისი მთელი არსენალი, მათ შორის ბირთვული იარაღი, – ეს განცხადება ირლანდიაში რუსეთის საელჩოს პრესსამსახურმა გამოაქვეყნა.

„უპასუხისმგებლო და მოკლე ხედვის მქონე ევროპული პოლიტიკური ელიტა სახიფათო თამაშს თამაშობს. როგორც რუსეთის საგარეო საქმეთა მინისტრმა, სერგეი ლავროვმა ცოტა ხნის წინ განაცხადა, თუ დასავლეთი თავს დაგვესხმება, ჩვენ ვუპასუხებთ და ეს იქნება სრულიად განსხვავებული ომი – და ძალიან ხანმოკლე“, – ნათქვამია განცხადებაში.

საელჩომ განაცხადა, რომ ევროკავშირი და ნატო ზრდიან სამხედრო აქტივობას რუსეთის მთელ დასავლეთ საზღვარზე, ალიანსის წევრები განუწყვეტლივ ატარებენ სამხედრო წვრთნებს და უერთდებიან „წინასწარი შეკავების“ ინიციატივებს, რაც მოიცავს ფრანგული ბირთვული იარაღის განლაგებას რუსეთის საზღვრებთან. მათ ასევე მოიხსენიეს ინფორმაცია, რომ ნატო ემზადება კალინინგრადის რეგიონის საჰაერო და საზღვაო ბლოკადისთვის.

„ასეთ სცენარში შეიარაღებული კონფლიქტის რისკი მაღალია, რაც იმას ნიშნავს, რომ რუსეთი კონფლიქტის ადრეულ ეტაპზე ალიანსის ქვეყნებში გადაწყვეტილების მიმღებ ცენტრებზე პრევენციულ დარტყმებს განახორციელებს“, – განაცხადა დიპლომატიურმა წარმომადგენლობამ.

ამავდროულად, უწყებამ აღნიშნა, რომ რუსეთს „არ აქვს გეგმები, მიზეზები და რეალური მოტივები ევროპასთან სიტუაციის ესკალაციისთვის“ და მოუწოდა ევროპულ ქვეყნებს, ძალიან სერიოზულად მოეკიდონ ამ საკითხს.