უნგრეთის საგარეო საქმეთა მინისტრმა ევროპის საბჭოში სიტყვით გამოსვლისას განაცხადა, რომ დასავლეთის მიზანი სანქციების პოლიტიკით ომის შეჩერება და რუსეთის ეკონომიკურად დაჩოქება იყო, თუმცა ომის 16 თვის თავზე, ევროპამ ეს ვერ შეძლო.

პიტერ სიარტოს თქმით, ალოგიკურია შეერთებული შტატების მხრიდან ე.წ. შეჯიბრის გამოცხადება თუ ვინ უფრო მეტ სამხედრო დახმარებას მისცემს უკრაინას. უნგრეთის პირველი დიპლომატი მიიჩნევს, რომ ომი განსაკუთრებულ ზიანს უკრაინის სამეზობლოში მოიტანს, შესაბამისად დასავლეთის მთავარი მიზანი ადამიანების სიცოცხლის გადარჩენა უნდა იყოს, რომელიც მხოლოდ მშვიდობის დამყარებით არის შესაძლებელი.

"ეს ომი უკრაინაში არ არის ევროპელი ხალხის ომი, მაგრამ ევროპის ყველა მოქალაქე იხდის ომის ფასს ენერგიის მზარდი ფასების სახით, საქონელზე, საკვებზე და ა.შ. სამწუხაროდ, ჩვენი კონკურენტუნარიანობა, როდესაც საქმე ეხება ევროპულ ეკონომიკას, უარესია, ვიდრე ოდესმე.

რაც უფრო მეტი იარაღი მიეწოდება უკრაინას, მით უფრო დიდხანს გაგრძელდება ეს ომი. და რაც უფრო დიდხანს გაგრძელდება ეს ომი, მით უფრო მეტი ადამიანი დაიღუპება. ხალხის სიცოცხლის გადარჩენა ომით შეუძლებელია.

რაც შეეხება სანქციების პოლიტიკას, მიზანი იყო რუსეთის მუხლებზე დაჩოქება ეკონომიკურად. მეორე მიზანი, სანქციებით ომის შეჩერება იყო. 16 თვე გავიდა სანქციების ათი პაკეტის შემოღებიდან და ჩვენ ვერ ვხედავთ ამ ორი მიზნიდან რომელიმესთან მიახლოებას. რუსეთი ნამდვილად არ არის დაჩოქილი, როდესაც საქმე ეკონომიკას ეხება და ომი სულ უფრო და უფრო სასტიკი ხდება.

თუ გადახედავთ რა გააკეთა შეერთებულმა შტატებმა, ეკონომიკურად რომ ვთქვათ, მათ შემოიღეს ინფლაციის შემცირების აქტი, რომელიც არის რეგულაცია, რომელიც ღიად ანიჭებს პრიორიტეტს აშშ-ს. აქ კი, სანქციების გამო, ევროპული კომპანიები სულ უფრო მეტ ეკონომიკურ გამოწვევებსა და დაბრკოლებებს აწყდებიან. თუ ამ ორს ერთმანეთის გვერდით დააყენებთ, ცხადი ხდება, რომ ოკეანის ორივე მხარეს ომზე ეკონომიკური რეაქციებისადმი განსხვავებული მიდგომის გამო ევროპული კომპანიების კონკურენტუნარიანობა, ძალიან იკლებს.

ძვირფასო კოლეგებო, ჩვენ უნგრელები აქ ძალიან, ძალიან განსაკუთრებულ სიტუაციაში ვართ. ჩვენ უკრაინის მეზობელი ქვეყანა ვართ. ამიტომ, ესკალაციის რისკი ყველაზე სერიოზულია აქ. თუ ომი გამწვავდება, ის ათასობით კილომეტრის მოშორებით კი არ მოხდება, არამედ უშუალო სამეზობლოში," - აცხადებს უნგრეთის საგარეო საქმეთა მინისტრი პიტერ სიარტო.