დანიის პრემიერ-მინისტრმა, მეტე ფრედერიკსენმა განაცხადა, რომ აშშ-ის მთავრობა ამჟამად ქმნის უამრავ გაურკვევლობას უკრაინაში ომთან დაკავშირებით და გამოთქვა ეჭვი, რომ რუსეთის ლიდერს მშვიდობა სურს.

„ამერიკელების მიმართ თავს არ ვგრძნობ ისე თავდაჯერებულად, როგორც წარსულში. მაგრამ ვფიქრობ, ყველა გაოცებულია იმით, თუ რა სისწრაფით შეიქმნა გაურკვევლობა და ჩვენ უნდა ვუპასუხოთ ამას“, - აღნიშნა დანიის მთავრობის მეთაურმა.

მეტე ფრედერიკსენმა ასევე აღნიშნა, რომ არ ენდობა პუტინს და მის განზრახვებს და არ ფიქრობს, რომ „მას მშვიდობა სურს უკრაინაში“.

„მე მესმის, რომ ბევრი ფიქრობს, რომ მშვიდობიანი გადაწყვეტა ან ცეცხლის შეწყვეტა კარგი იდეაა, მაგრამ არსებობს რისკი, რომ უკრაინაში მშვიდობა უფრო სახიფათო იყოს, ვიდრე ომი, რომელიც ახლა მიმდინარეობს“, - დასძინა მან.