კატარელი შუამავლების მიერ აშშ-სა და ირანს შორის დიპლომატიური გარღვევის მიღწევის მცდელობებმა ამ კვირაში მცირე პროგრესი განიცადა, რადგან არცერთი მხარე არ აპირებს დათმობაზე წასვლას, – ამის შესახებ ინფორმაციას „აქსიოსი“ ავრცელებს.

გამოცემის ცნობით, ჩიხური მდგომარეობა აძლიერებს რწმენას, რომ სამხედრო კონფლიქტის განახლების ალბათობა იზრდება.

აშშ-ის ოფიციალური პირები ვარაუდობენ, რომ პრეზიდენტმა ტრამპმა შესაძლოა, შუალედური არჩევნების შემდეგ მასშტაბური საბრძოლო მოქმედებების განახლების ბრძანება გასცეს.

ორი ინფორმირებული წყაროს ცნობით, კატარის ოფიციალური პირები მცდელობებს არ წყვეტენ, თუმცა ორივე მხარის მიმართ უკმაყოფილება სულ უფრო ეზრდებათ. კატარელმა შუამავალმა ალი ალ-თავადიმ ნიუ იორკში რამდენიმესაათიანი შეხვედრა გამართა ირანის საგარეო საქმეთა მინისტრ აბას არაღჩისა და მის გუნდთან. ინფორმირებული წყაროს თანახმად, მათ განიხილეს კატარის მიერ წარდგენილი კომპრომისული წინადადება, რომელიც ორგვერდიან დოკუმენტს წარმოადგენს.

ორი სხვა წყაროს თანახმად, კატარის გეგმა მიზნად ისახავდა როგორც ირანის მოთხოვნის დაკმაყოფილებას აშშ-ის საზღვაო ბლოკადის მოხსნის თაობაზე, ისე აშშ-ის მოთხოვნის შესრულებას ირანის მხრიდან ბირთვულ საკითხებში დათმობებზე წასვლის შესახებ. ვაშინგტონში ალ-თავადიმ მოლაპარაკებები გამართა ტრამპის წარმომადგენელ ჯარედ კუშნერთან და აშშ-ის სხვა ოფიციალურ პირებთან. შეხვედრის მცირე ნაწილს ვიცე-პრეზიდენტი ვენსიც დაესწრო.

აშშ-ის ოფიციალურმა პირებმა რამდენიმე მედიასაშუალებას, მათ შორის „აქსიოსს“ აცნობეს, რომ მოლაპარაკებები „პოზიტიური და კონსტრუქციული“ იყო და ირანმა „მზაობა გამოთქვა, მოქნილობა გამოეჩინა ბირთვულ საკითხებთან დაკავშირებით“. მათ ისიც კი განაცხადეს, რომ ტრამპი მზად იყო, ირანისთვის სანქციები შეემსუბუქებინა და გაყინული სახსრები გაეთავისუფლებინა, სანაცვლოდ კი ირანს ბირთვული პროგრამის შეზღუდვისკენ მიმართული კონკრეტული ნაბიჯები უნდა გადაედგა. თუმცა, რამდენიმე საათის შემდეგ, როდესაც კატარის ოფიციალური პირები ჯერ კიდევ თეთრ სახლში იმყოფებოდნენ, ტრამპმა Truth Social-ზე დაწერა, რომ ირანისთვის არაფერი შეუთავაზებია.

ერთ-ერთი წყაროს ცნობით, 29 სექტემბერს გამართულ მოლაპარაკებებში მნიშვნელოვანი წინსვლა არ ყოფილა.

„პროცესი ჩიხშია შესული. ირანი ისეთ პირობებს აყენებს, რომელთა მიღებაც აშშ-ს არ შეუძლია, თავად აშშ კი მიიჩნევს, რომ უპირატესობას ფლობს, ამიტომ კომპრომისზე წასვლის საჭიროებას ვერ ხედავს“, – განაცხადა წყარომ.

რეგიონის სხვა შუამავლებმა, მათ შორის პაკისტანმა და ეგვიპტემ, ირანს ბირთვულ საკითხებში დათმობებზე წასვლისკენ მოუწოდეს. თუმცა, როგორც ინფორმირებული წყარო იუწყება, ირანულმა მხარემ განაცხადა, რომ ამ ნაბიჯის გადადგმას მხოლოდ მას შემდეგ განიხილავს, რაც აშშ ივნისში გაფორმებულ ურთიერთგაგების მემორანდუმს დაუბრუნდება.