დღეს, საქართველოში მცხეთობა-სვეტიცხოვლობა, კვართის დღესასწაული აღინიშნება. თარიღთან დაკავშირებით, საქართველოს ყველა მოქმედ ტაძარში სადღესასწაულო ღვთისმსახურება აღევლინება.

სვეტიცხოვლობას ქვეყანა წელიწადში ორჯერ, 14 ოქტომბერს და 13 ივლისს ზეიმობს. 14 ოქტომბერს ეკლესია ქრისტეს კვართს იხსენიებს, 13 ივლისს კი – ქრისტეს ყველა მოციქულს. დღევანდელი დღე ოფიციალურად უქმეა.

დღესასწაულის ფარგლებში მცხეთაში დილიდან დაგეგმილა მრავალფეროვანი შემეცნებითი, კულტურული და სპორტული აქტივობები. მოეწყობა სანახაობითი ატრაქციები, საგამოფენო, ისტორიული, სადეგუსტაციო, ეთნოგრაფიულ-თემატური, არქეოლოგიური, საბავშვო-გასართობი სივრცეები და ფოტოზონები. გაიმართება კონცერტი. დაჯილდოვდებიან მცხეთის საპატიო მოქალაქეები.