თურქეთის სამხრეთ-აღმოსავლეთ რეგიონში ძლიერმა წვიმამ საცხოვრებელი სახლები, სამედიცინო დაწესებულებები და სხვა შენობა-ნაგებობები დატბორა. ინფორმაციას Daily Sabah-ი ავრცელებს.

თურქული მედიის ცნობით, 1 ადამიანი დაიღუპა, ხოლო 4 უგზო-უკვლოდ დაკარგულად მიიჩნევა.

თურქეთის სახელმწიფო მეტეოროლოგიურმა სამსახურმა 15-20 მარტის ამინდის პროგნოზი გამოაქვეყნა და ნარინჯისფერი განგაში გამოცხადდა.

პროვინციები ადიამანი, დიარბაკირი, ელაზიგი, მალატია, კაჰრამანმარასი, მარდინი, სივასი, შანლიურფა და კილისი იმ პროვინციებს შორის არის, სადაც უხვი ნალექის გამო ნარინჯისფერი განგაში გამოცხადდა.

თებერვლის დასაწყისში მომხდარმა მიწისძვრებმა თურქეთსა და სირიაში 52 000-ზე მეტი ადამიანის სიცოცხლე შეიწირა.