Biletebi.ge-ის თანადამფუძნებელი დავით მიზანდარი მის პირად facebook-გვერდზე განცხადებას ავრცელებს, სადაც ამბობს, რომ პლატფორმაზე კინოს ბილეთების გაყიდვა აიკრძალა.

განცხადებაში ნათქვამია, რომ „თიბისი“ ბანკმა, რომელიც TKT.GE-ს პარტნიორია, კინოს ბილეთების გაყიდვის ექსკლუზიური უფლება მოიპოვა და თავის პარტნიორ კომპანიას გადასცა.

„თიბისი არ არის ბანკი, ეს არის სიბოროტის საამქრო, რომელიც საკუთარ კეთილდღეობას სხვისი მოსპობით აღწევს...

მისი შვილობილი კომპანია - TKT, რომლის უკვე 100%-იანი ბატონ-პატრონი თიბისი გახდა, საბილეთო ბაზარზე ჯანსაღი კონკურენციის მაგივრად, რისი მიღწევაც შეუძლია მრავალი მარკეტინგული აქტივობით, ბანკის ფულადი რესურსების ხარჯზე იღებს ბილეთების ექსკლუზიური გაყიდვის უფლებას, ყველანაირი ტენდერის ანდა ფასთა მოკვლევის გარეშე. სქემა მარტივია, ბანკი ასპონსორებს ორგანიზაციას, ხოლო TKT იღებს გაყიდვების ექსკლუზივს.

ამჯერად, ჩვენ, Biletebi.ge-ს თიბისი-მ შეგვიჩერა კინოთეატრების გაყიდვა და თვითონ აიღო ექსკლუზიური უფლება ონლაინ რეალიზაციაზე ზემოთ ხსენებული სქემით.

ჩვენთან კინოები გუშინ გამოირთო....

მათი სლოგანებიც - „შენ გვერდით შენი ბანკია“, „ჩვენ ვაძლიერებთ ერთმანეთს“ ესეც მომხმარებლის შეცდომაში შეყვანაა და ფარსია! თიბისისთან ნებისმიერი კავშირი დამანგრეველია ბიზნესისთვის.

ყველანაირ გზას მივმართავ იმისათვის, რომ დაკარგული ტერიტორიები დავიბრუნო ამ სარეველა წარმონაქმნისგან!“ - წერს დავით მიზანდარი სოციალურ ქსელში.

ინფორმაციისთვის, ამ ეტაპზე Biletebi.ge-ს საიტზე კინოს ბილეთები გაყიდვა შეჩერებულია.
 

წყარო : bm.ge