ჩვენ ვამუშავებთ კონსტიტუციის პროექტს და გვსურს ახალი კონსტიტუციის მიღება, მაგრამ გვექნება თუ არა ახალი კონსტიტუცია, ამას სომხეთის რესპუბლიკის მოსახლეობა გადაწყვეტს, – ასე ეხმაურება სომხეთის იუსტიციის მინისტრი სრბუჰი გალიანი, აზერბაიჯანის პრეზიდენტის თანაშემწის, ჰიქმეთ ჰაჯიევის განცხადებას, რომ საბოლოო შეთანხმებისთვის საჭიროა სომხეთის კონსტიტუციაში ცვლილებები შევიდეს და რომ „ნამდვილი სომხეთის“ კონცეფცია ახალ კონსტიტუციაში აისახოს.

„ის ფაქტი, რომ კონსტიტუციის პროექტი მუშავდება, არავისთვისაა საიდუმლო. ასევე არ არის საიდუმლო, რომ ახალი კონსტიტუციის მიღება ასევე პოლიტიკური ვალდებულება იყო, ამიტომ ჩვენ კვლავაც ერთგულები ვრჩებით ჩვენი დაპირებების და ვასრულებთ მათ. ტექსტი ამჟამად განხილვის პროცესშია და მის გამოქვეყნებასთან დაკავშირებით ვერაფერს ვიტყვი“, – თქვა მან.

„სამოქალაქო კონტრაქტის“ პარტიის მიერ პარლამენტში ორი მესამედის უმრავლესობის არარსებობასთან დაკავშირებით, რომ კონსტიტუციური ცვლილებების პროექტი რეფერენდუმზე წარედგინათ, სომხეთის იუსტიციის მინისტრმა აღნიშნა, რომ ისინი პროექტს ეროვნულ ასამბლეას დადგენილი წესით წარუდგენენ: „თუ ეროვნული ასამბლეა მას არ დაამტკიცებს, მაშინ არსებობს პროფესიული მიდგომები, რომელთა მიხედვითაც დემოკრატია გულისხმობს ხალხის შეუზღუდავ ძალაუფლებას, გამოხატოს თავისი სურვილები, განსაკუთრებით ხელმოწერების მეშვეობით. ახლა ვარაუდის გაკეთება არ შემიძლია; ჩემთვის საუკეთესო სცენარი იქნება ის, რომ კონსტიტუციის ახალი ტექსტი ისეთი იყოს, რომ პარლამენტმა დაამტკიცოს. არცერთ სცენარს არ გამოვრიცხავ“, – აღნიშნა სრბუჰი გალიანმა.

მან ასევე განაცხადა, რომ ახალი კონსტიტუცია ეკლესიის მიმართულებით რაიმე კონცეპტუალურ ცვლილებას არ ითვალისწინებს.