ევროკავშირმა მოსკოვთან პრაგმატული დიალოგი უნდა წამოიწყოს, რისთვისაც საჭიროა წარმომადგენელი, რომელიც ყველა წევრი ქვეყნის სახელით ისაუბრებს, — განაცხადა იტალიის პრემიერ-მინისტრმა ჯორჯია მელონიმ.

მელონის თქმით,  კოორდინაცია არ ნიშნავს უფლებამოსილების დელეგირებას. უკრაინასა და რუსეთს შორის მშვიდობიანი მოწესრიგების ნებისმიერ სერიოზულ სცენარში, მრავალი პირობა ეხება ევროპის ინტერესებს და გავლენას ახდენს მასზე, რაც იმას ნიშნავს, რომ სწორედ ევროპამ უნდა აწარმოოს მოლაპარაკებები ამ საკითხებზე.

"მე ვგულისხმობ იმას, რომ ჩვენი სიმტკიცე რუსეთის მიმართ არ უნდა გადაიზარდოს დიპლომატიურ სიბრმავეში ან პროცესებიდან თვითგათიშვაში. მე კვლავაც ვამტკიცებ, რომ ევროპამ უნდა წამოიწყოს ერთობლივი, პრაგმატული მსჯელობა იმაზე, თუ როგორ ააგოს ურთიერთობები მოსკოვთან. სამართლის უზენაესობის პრინციპების დაცვა ხელს არ გვიშლის იმაში, რომ შევინარჩუნოთ ჩვენი მიზნების მისაღწევად აუცილებელი საკომუნიკაციო არხები. ევროკავშირი მზად უნდა იყოს, რომ წამყვანი როლი იკისროს ამ დიალოგში; შეცდომა იქნებოდა უბრალოდ დინების მიყოლა. მაგრამ ამისათვის — მას შემდეგ, რაც ჩვენი თვალსაზრისით მკაფიოდ განვსაზღვრავთ მოლაპარაკებების საბოლოო მიზანს — უნდა გადავწყვიტოთ, ვინ შეძლებს კონკრეტულად ევროპის ინტერესების წარმოდგენას მოლაპარაკებების მაგიდასთან. ვინაიდან, ქაოსური მოქმედებები და ცვალებადი ფორმატების გამოყენება, რომლებიც სათანადო წარმომადგენლობას ვერ უზრუნველყოფენ, მხოლოდ ფრაგმენტაციისკენ, გაურკვევლობისა და პოზიციების დასუსტებისკენ მიგვიყვანს. მოკლედ რომ ვთქვათ, ჩემი აზრით, მთავარი პრობლემა ის კი არ არის, თუ ვინ მონაწილეობს ან არ მონაწილეობს ამა თუ იმ ფორმატში, არამედ ის, რომ არსებული მდგომარეობით არცერთ ფორმატს არ გააჩნია ლეგიტიმაცია, რათა მთელი ევროპის სახელით გამოვიდეს“.- განაცხადა მელონიმ.