ისრაელის თავდაცვის ძალებში აცხადებენ, რომ ამ ეტაპზე ირანიდან დამატებითი სარაკეტო შეტევის საფრთხე არ არსებობს.

როგორც ისრაელის თავდაცვის ძალების პრესსპიკერმა, დანიელ ჰაგარიმ განაცხადა, ამ დროისთვის ირანის მიერ ისრაელის მიმართულებით შეტევები აღარ ხორციელდება.

„იყო გარკვეული დარტყმები ქვეყნის ცენტრალურ და სამხრეთ ნაწილებში. ამ ეტაპზე ჩვენ ვაფასებთ თავდასხმის შედეგებს, მაგრამ მსხვერპლის შესახებ ინფორმაცია არ გვაქვს“, – განაცხადა ჰაგარიმ.

ამასთან, ისრაელის თავდაცვის ძალებში განაცხადეს, რომ მოსახლეობას შეუძლია, დატოვოს თავშესაფრები. მათივე ცნობით, ისრაელის საჰაერო სივრცე გაიხსნა.

ისრაელის თავდაცვის ძალების პირველადი შეფასებით, ირანმა ისრაელის მიმართულებით 180 რაკეტა გაუშვა, თუმცა ეს არ არის საბოლოო ციფრი და ამჟამად მიმდინარეობს სიტუაციის შეფასება.