ქართული ოცნების თავმჯდომარე, ირაკლი კობახიძე რუსეთთან საზღვრის ჩაკეტვის ინიციატივას სისულელეს უწოდებს და ამბობს, რომ ამაზე კომენტარს არ გააკეთებს. ამის შესახებ მან რუსეთში მიმდინარე მოვლენების შეფასების დროს ისაუბრა და თქვა, რომ "ქვეყნის უსაფრთხოება დაცულია".

"ქვეყნის უსაფრთხოება არის დაცული, ყველაფერი არის დაცული - ამაზე მთელი ამ პერიოდის განმავლობაში ზრუნავენ ჩვენი უწყებები, სახელმწიფო დგას მყარად უსაფრთხოების სადარაჯოზე და არავის მითითება, მით უმეტეს გახარიას მითითება, ამასთან დაკავშირებით არ გვჭირდება. [საზღვრის ჩაკეტვა] სისულელეა, სისულელეზე კომენტარს არ გავაკეთებ", - განაცხადა კობახიძემ.

დღეს პარტია საქართველოსთვის ლიდერმა, გიორგი გახარიამ მთავრობას უსაფრთხოების საბჭოს მოწვევისკენ და რუსეთთან საზღვრების დროებით ჩაკეტვისკენ მოუწოდა. გახარიას თქმით, საფრთხე რეალურია და მშვიდობის შენარჩუნებისთვის დროულად მოქმედებაა საჭირო.