„უცხოური გავლენის გამჭვირვალობის შესახებ“ კანონის მოთხოვნის შესაბამისად, განაცხადის ჩაბარება იუსტიციის სახლის ფილიალებში დღესაც იქნება შესაძლებელი. იუსტიციის სახლის ინფორმაციით, ორგანიზაციებისთვის შესაბამის რეესტრში დარეგისტრირების ვადა 2 სექტემბრის ჩათვლითაა განსაზღვრული.

დაინტერესებულ პირებს და სუბიექტებს იუსტიციის სახლის ფილიალებს შეუძლიათ მიმართონ 10:00-დან 17:00 საათამდე, საქართველოს 30 ქალაქში. მათ შორის: თბილისის და ბათუმის ცენტრალურ ფილიალებში, რუსთავში, გარდაბანში, მარნეულში ბოლნისში, გურჯაანში, თელავში, ყვარელში, ლაგოდეხში, თიანეთში, ახალქალაქში, ახალციხეში, ბორჯომში, ზუგდიდში, ფოთში, მარტვილში, სენაკში, ხონში, ქუთაისში, სამტრედიაში, ზესტაფონში, ქარელში, წყალტუბოში, ყაზბეგში, ოზურგეთში, ხაშურში, გორში, ონსა და მესტიაში.

20 პროცენტზე მეტი უცხოური დაფინანსების მქონე 400-ზე მეტმა ორგანიზაციამ საჯარო რეესტრს უკვე მიმართა. რეგისტრაციის დროს აუცილებელია, წინა წელს მიღებული ნებისმიერი ფულადი თანხისა და ქონებრივი ღირებულების სხვა სახის მატერიალური წყაროს, მისი ოდენობისა და მიზნობრიობის ასახვა. რეგისტრაციაზე უარის შემთხვევაში ორგანიზაციას სამინისტრო თავად დაარეგისტრირებს. დეკლარაციის არშევსება კი უკვე ფინანსურ ჯარიმებს იწვევს.