ექსპრეზიდენტის, მიხეილ სააკაშვილის დედის, გიული ალასანიას განცხადებით, სააკაშვილის ჯანმრთელობის მდგომარეობა არ არის გაუმჯობესებული, რადგან მას აქვს ტემპერატურა და წნევა. ამის შესახებ ალასანიამ კლინიკა „ვივამედთან“ ჟურნალისტებს განუცხადა.

ამასთან, ალასანიას თქმით, მიხეილ სააკაშვილთან პოლიტიკის შესახებ არ უსაუბრია.

„მე თვითონ ვარიდებ ამ თემას თავს, არ მინდა ამ თემაზე საუბარი, რადგან დამატებით ნერვები არ ავუშალო. მისი ჯანმრთელობა უფრო მაინტერესებს ხოლმე. სიცხე გუშინ ჰქონდა 38 გრადუსამდე, წნევა 140/100-ზე. გამოჯანმრთელებამდე შორს ვართ. კვებას რაც შეეხება, ხორცს ვერ ჭამს, ცხიანს ვერ ჭამს. რაღაც ცოტ-ცოტას ახერხებს. მე ვერ ვხედავ ცვლილებას. სიცხე ისევ 38-მდე აქვს, წნევა 140/100-ზე, რანაირად არის მისი ჯანმრთელობა გაუმჯობესებული“, – განაცხადა გიული ალასანიამ.

მედიასთან კომენტარი გააკეთა “ვივამედის” ხელმძღვანელმაც. ზურა ჩხაიძე აცხადებს, რომ “მიხეილ სააკაშვილი გააქტიურებულია, განწყობაც გაუმჯობესებული აქვს, კვების ნაწილი რაოდენობრივად გაუმჯობესებულია, თუმცა სრულად არ ხდება ჩვენი რეკომენდაციების გათვალისწინება”.