ეს არის კლასიკური მაგალითი, თუ როგორ არის შეფუთული ლობისტური საქმიანობა შეფუთული არასამთავრობო ორგანიზაციის ფორმაში, – ამის შესახებ საქართველოს პარლამენტის თავმჯდომარე შალვა პაპუაშვილმა „ქრონიკასთან“ თინა ხიდაშელზე საუბრისას განაცხადა.

„ამავე დროს ეს პრობლემატურია, ვინაიდან ვხედავთ, რომ დაფინანსება შემოდის არაღიარებული ქვეყნიდან - ტაივანიდან და ამ დაფინანსების მიზანია, რომ დააზიანოს ჩვენი სტრატეგიული პარტნიორი - ჩინეთი. ამას ემსახურება არასამთავრობო ორგანიზაციის სახით, საქართველოს ყოფილი თავდაცვის მინისტრი, რომელიც ამავე დროს დაკავშირებულია „ლელოსთან“. ეს თავად არის სკანდალური“, - აღნიშნა პაპუაშვილმა.

საქართველოს პარლამენტის თავმჯდომარემ, შალვა პაპუაშვილმა 19 იანვარს განაცხადა, რომ თინა ხიდაშელი ცდილობს, ანტიჩინური განწყობები გააღვივოს.

„მისი ორგანიზაცია ტაივანიდან ფინანსდება, საინტერესოა, როგორც თავდაცვის ყოფილი მინისტრი, როგორ ხედავს ტაივანს და აღიარებს თუ არა ჩინეთის ტერიტორიულ მთლიანობას?“, - განაცხადა პაპუაშვილმა.

თინა ხიდაშელის ორგანიზაცია მის დაფინანსებასთან დაკავშირებით გავრცელებულ ინფორმაციას გამოეხმაურა. ხიდაშელმა ტაივანთან კავშირი დაადასტურა, თუმცა აქვე განმარტა, რომ ოფიციალური წყაროებიდან დაფინანსება არ მიუღია.