უკრაინელმა მესაზღვრეებმა მოლდოვის საზღვართან სატვირთო მანქანის მისაბმელში ხორბლის ნაცვლად 41 უკრაინელი დეზერტირი აღმოაჩინეს. ამის შესახებ უკრაინის სასაზღვრო სამსახურის ოფიციალურმა წარმომადგენლმა ანდრეი დემჩენკომ განაცხადა. ინფორმაციას kp.ru ავრცელებს.

დემჩენკოს ინფორმაციით, სატვირთო ოდესის ოლქიდან მოლდოვაში მიდიოდა. ამჟამად დეზერტირების საკითხზე შემოწმება ტარდება და, შესაძლოა, ადმინისტრაციული ან სისხლის სამართლის საქმე აღიძრას.

ეს პირველი მსგავსი შემთხვევა არ არის. 10 ივნისს უკრაინა-უნგრეთის საზღვარი სამხედრო ნომრიანმა ავტომობილმა გადაკვეთა, რომელმაც არალეგალურად 32 ადამიანი გადაიყვანა. მოგვიანებით უნგრეთის პოლიციამ განაცხადა, რომ სატვირთო აღმოაჩინა და ყველა არალეგალური მიგრანტი დააკავა.