აშშ-ის პრეზიდენტმა დონალდ ტრამპმა ყველა ქვეყნიდან იმპორტზე 10%-იანი საბაზისო ტარიფი გამოაცხადა და შეერთებულ შტატებთან ჭარბი სავაჭრო პრაქტიკის მქონე ათობით ქვეყანაზე უფრო მაღალი ტარიფები დააწესა. კრიტიკოსების თქმით, აღნიშნული ნაბიჯი საფრთხეს უქმნის გლობალური ეკონომიკის არქიტექტურის დიდ ნაწილს და მათ ფართო სავაჭრო ომების რისკის ქვეშ აყენებს.

თეთრ სახლში სიტყვით გამოსვლისას ტრამპმა განაცხადა, რომ შეერთებული შტატები  34%-იან გადასახადს დააწესებს ჩინეთიდან იმპორტზე, 20%-იანს დაუწესებს -  ევროკავშირს, 25%-იანს - სამხრეთ კორეას, 24%-იანს იაპონიას და 32%-იანს - ტაივანს. 

პრეზიდენტმა აღწერა გლობალური სავაჭრო სისტემა, რომლის ფორმირებას შეერთებულმა შტატებმა შეუწყო ხელი მეორე მსოფლიო ომის შემდეგ.

„ჩვენი ქვეყანა გაძარცვეს და გააუპატიურეს სხვა ქვეყნებმა. გადასახადის გადამხდელებს 50 წელზე მეტია, ძარცვავენ, მაგრამ ეს აღარ მოხდება. ამიტომ, შუაღამისას, ჩვენ დავაწესებთ 25%-იან ტარიფს უცხოური წარმოების ყველა ავტომობილზე“, - განაცხადა ტრამპმა. 

ტრამპმა, ტარიფების ამოქმედების მიზნით, ეროვნული ეკონომიკური საგანგებო მდგომარეობა  გამოაცხადა. მან პირობა დადო, რომ ტარიფების დაწესების შედეგად, შეერთებული შტატების ქარხნებში სამუშაო ადგილები კვლავ გაჩნდება.