უცხოური დაფინანსების გამჭვირვალობა ამერიკულ უნივერსიტეტებში - თეთრი სახლი, ამერიკის პრეზიდენტის, დონალდ ტრამპის ბრძანებით გამოცემულ საკანონმდებლო განკარგულებას ავრცელებს, რომელიც ამერიკულ უნივერსიტეტებში, უცხოური დაფინანსების გამჭვირვალობას მკაცრად გააკონტროლებს:

"ამერიკის შეერთებული შტატების პრეზიდენტის ბრძანებით, კონსტიტუციისა და შესაბამისი კანონების საფუძველზე, განისაზღვრება შემდეგი:

დაწესებულება 1. მიზანი და პოლიტიკა.

1965 წლის უმაღლესი განათლების აქტის 117-ე მუხლი (20 U.S.C. 1011f) ავალდებულებს უმაღლესი განათლების დაწესებულებებს, განაცხადონ მნიშვნელოვანი ოდენობის უცხოური დაფინანსების წყაროების შესახებ.

თუმცა, რადგან აღნიშნული მუხლი მკაცრად არ სრულდება, უცნობია ის რეალური რაოდენობა, წყაროები და მიზნები, რისთვისაც ამერიკულ კამპუსებში უცხოური ფული მიედინება. ერთი კვლევის მიხედვით, 2010-დან 2016 წლამდე, უნივერსიტეტებმა უცხოური დაფინანსების ნახევარზე მეტის შესახებ ვერ განაცხადეს. მაშინაც კი, როდესაც დაფინანსება დეკლარირებულია, მისი რეალური წყარო ხშირად დამალულია.

ამერიკის საგანმანათლებლო, კულტურული და ეროვნული უსაფრთხოების ინტერესების დასაცავად, აუცილებელია გამჭვირვალობა იმ უცხოური სახსრების შესახებ, რომლებიც მიემართება ამერიკულ უმაღლეს სასწავლებლებსა და კვლევით დაწესებულებებში. ჩემი პირველი ვადის განმავლობაში, განათლების დეპარტამენტმა 2019-2021 წლებში დაიწყო გამოძიებები 19 კამპუსში, რის შედეგადაც უნივერსიტეტებმა განაცხადეს $6.5 მილიარდზე მეტი ოდენობის უცხოური დაფინანსების შესახებ.

წინა ადმინისტრაციამ ეს მუშაობა გააუქმა, გადაიტანა განათლების დეპარტამენტის სპეციალიზებული საგამოძიებო ერთეული ისეთ განყოფილებაში, რომელიც არ იყო ადეკვატური ამ ფუნქციის შესასრულებლად, რაც აფერხებდა გამოძიებებს და ზღუდავდა საზოგადოებრივ წვდომას უცხოური საჩუქრებისა და კონტრაქტების შესახებ.

ჩემი ადმინისტრაციის პოლიტიკაა, დაასრულოს უცხოური დაფინანსების საიდუმლოება ამერიკულ საგანმანათლებლო დაწესებულებებში, დაიცვას იდეების თავისუფალი ბაზარი უცხოური პროპაგანდისგან და დაიცვას ამერიკელი სტუდენტები და კვლევები უცხოური ექსპლუატაციისგან.

დაწესებულება 2. მტკიცე აღსრულება ამერიკის ინტერესების დასაცავად.

განათლების მდივანმა უნდა მიიღოს ყველა შესაბამისი ზომა მოთხოვნების აღსასრულებლად, მათ შორის ითანამშრომლოს გენერალურ პროკურორთან და სხვა აღმასრულებელი დეპარტამენტების, სააგენტოებისა და ოფისების ხელმძღვანელებთან, რათა უზრუნველყოს უმაღლესი სასწავლებლების მიერ უცხოური დაფინანსების სრულყოფილი და დროული დეკლარირება. ეს ზომები მოიცავს:

(ა) მდივანი გადადგამს შესაბამის ნაბიჯებს წინა ადმინისტრაციის იმ ქმედებების გასაუქმებლად, რომლებიც აძლევდა უნივერსიტეტებს საშუალებას დაემალათ მათი უცხოური დაფინანსება;

(ბ) მდივანი გადადგამს ნაბიჯებს, რათა უნივერსიტეტებმა უფრო დეტალურად განაცხადონ უცხოური დაფინანსების შესახებ, მათ შორის რეალური წყაროებისა და მიზნების შესახებ;

(გ) მდივანი უზრუნველყოფს ამერიკელი ხალხისთვის უფრო ფართო წვდომას ინფორმაციაზე უცხოური დაფინანსების შესახებ;

(დ) მდივანი და გენერალური პროკურორი პასუხისმგებლობას დააკისრებენ იმ უმაღლეს სასწავლებლებს, რომლებიც არ შეასრუელებენ კანონს უცხოური დაფინანსების დეკლარირების შესახებ. ამ მიზნის მისაღწევად, მდივანი ითანამშრომლებს შესაბამის აღმასრულებელ უწყებებთან აუდიტების და გამოძიებების ჩასატარებლად და საჭიროების შემთხვევაში მიმართავს გენერალურ პროკურორს სამართლებრივი აღსრულების თხოვნით.

დაწესებულება 3. შესაბამისობა ფედერალური დაფინანსების მიმღებთა მხრიდან.

განათლების მდივანი და სხვა აღმასრულებელი დეპარტამენტების ხელმძღვანელები მიიღებენ შესაბამის ზომებს, რათა მომავლში უზრუნველყონ, რომ უცხოური დაფინანსების დეკლარირების მოთხოვნებისადმი შესაბამისობის სერტიფიცირება ჩაითვალოს მნიშვნელოვან პირობად და ფედერალური გრანტების მისაღებად. დაფინანსება არ გაიცემა იმ შემთხვევაში, თუ დაფინანსების მიმღები არ შეესაბამება აღნიშნულ კანონს და სხვა შესაბამის მოთხოვნებს." - აღნიშნულია თეთრი სახლის მიერ გავრცელებულ განცხადებაში.