აშშ-ში Tesla-ს აქციები მკვეთრად ეცემა, რადგან ინვესტორები შიშობენ, რომ ამერიკელი ბიზნესმენის ილონ მასკის მიერ ახალი პოლიტიკური პარტიის დაარსება ელექტრომობილების მწარმოებელ ბრენდს კიდევ უფრო მეტ პრობლემას შეუქმნის.

7 ივლისს, Tesla-ს აქციები 7%-ზე მეტით დაეცა, რაც, Wall Street-ზე, ბაზრის გახსნამდე, კომპანიას $70 მილიარდის დაკარგვის რისკის ქვეშ აყენებს. ასეთ შემთხვევაში, მასკის აქციების ღირებულება 9 მილიარდ დოლარზე მეტით დაეცემა და 120 მილიარდ დოლარს შეადგენს. Forbes-ის მონაცემებით, Tesla-სა და Space X-ის ხელმძღვანელი კვლავაც მსოფლიოს უმდიდრეს ადამიანად რჩება, რომლის ქონებაც $400 მილიარდს შეადგენს.

Tesla-ს ღირებულება $1 ტრილიონზე ოდნავ ნაკლებია, თუმცა მისი აქციების ფასი შემცირდა დონალდ ტრამპთან ილონ მასკის ურთიერთობის გამო. თავდაპირველად, მასკის მიერ აშშ-ის პრეზიდენტისადმი ძლიერმა მხარდაჭერამ მომხმარებლების უკმაყოფილება გამოიწვია, ახლა კი ტრამპთან მისი ურთიერთობის ანტაგონისტურმა შემობრუნებამ ინვესტორები შეაშფოთა - მათი აზრით, თეთრი სახლი მასკის ბიზნესებზე ზეწოლას მოახდენს. 

,,მასკის განცხადება, რომ ის აშშ-ში პოლიტიკურ პარტიას დააფინანსებს, ინვესტორებს შეაშფოთებს. ძალიან მარტივად რომ ვთქვათ, Tesla-ს ისტორიაში ამ ყველაზე კრიტიკულ პერიოდში, კომპანიის ინვესტორებს/აქციონერებს ახლა ყველაზე ნაკლებად სურთ პოლიტიკაში მასკის უფრო ღრმად ჩაძირვა და Beltway-ის ისტებლიშმენტთან ბრძოლა. Tesla-ს ინვესტორებს მზარდი სისუსტის განცდა აქვთ, რადგან ისინი ღელავენ, რომ მასკი - კომპანიის უმსხვილესი აქციონერი - პოლიტიკისგან შორს უბრალოდ არ დარჩება“, - თქვა Wedbush Securities-ის ანალიტიკოსმა დენ აივზმა 

როგორც ცნობილია, დონალდ ტრამპმა ილონ მასკის გეგმებს „ამერიკის პარტიის“ შექმნასთან დაკავშირებით „სასაცილო“ უწოდა და მსოფლიოს უმდიდრესი ადამიანის მისამართით ახალი კრიტიკა წამოიწყო.