სუდანში ქვეყნის არმიასა და გასამხედროებულ დაჯგუფებას შორის შეიარაღებული დაპირისპირება განახლდა. ინფორმაციას „როიტერი“ ავრცელებს. 

მედიის ცნობით, საღამოს ქალაქ ომდურმანში სროლისა და აფეთქებების ხმა ისმოდა. იქ ქვეყნის არმიამ დრონები გამოიყენა სწრაფი რეაგირების ძალებზე დასარტყმელად.

კონფლიქტის გამო, შეწყვეტილია ელექტრომომარაგება. მოსახლეობას არ მიეწოდება სასმელი წყალი.

დედაქალაქ ხარტუმში კი ბიოლოგიური საფრთხის მაღალი რისკი გაჩნდა მას შემდეგ, რაც კონფლიქტის ერთ-ერთმა მხარემ, იმ ლაბორატორიის შენობა დაიკავა, სადაც სახიფათო მასალებია განთავსებული.

ცნობისთვის, სუდანის დედაქალაქში 15 აპრილის შემდეგ სწრაფი რეაგირების ძალებსა და ქვეყნის შეიარაღებულ ძალებს შორის საბრძოლო მოქმედებები მიმდინარეობს.