სომხეთის ეკლესია ქვეყნის პრემიერ-მინისტრს, ნიკოლ ფაშინიანს „ანტიეკლესიური კამპანიის წამოწყებაში“ ადანაშაულებს. სომხური მედიის თანახმად, 2 ივნისს წმინდა ეჩმიაძინის მთავარ საკათედრო ტაძარში სრულიად სომეხთა კათოლიკოსის. გარეგინ II-ის თავმჯდომარეობით გაიმართა უმაღლესი სასულიერო საბჭოს სხდომა, რომელშიც მონაწილეობა მიიღეს სომხეთისა და დიასპორის ეპისკოპოსებმა და ეპარქიების ხელმძღვანელებმა.
შეხვედრაზე განიხილეს არსებული გამოწვევები, ეკლესია-სახელმწიფოს ურთიერთობები, ასევე საზოგადოებისთვის მნიშვნელოვანი არაერთი ძირითადი საკითხი. ამასთან დაკავშირებით, უმაღლესმა სასულიერო საბჭომ განცხადება გაავრცელა, რომელშიც ნათქვამია, რომ ეროვნული ღირებულებებისა და ეკლესიის წინააღმდეგ დაწყებული პროცესები სავსეა დამანგრეველი შედეგებით და საფრთხეს უქმნის სომხურ სახელმწიფოებრიობას.
„სომხეთის პრემიერ-მინისტრმა სომხური სამოციქულო წმინდა ეკლესიის წინააღმდეგ კიდევ ერთი კამპანია დაიწყო, სახელმწიფო მოღვაწისთვის შეუფერებელი ენით, შეურაცხყოფითა და ბრალდებებით და საკუთარი თავის კანონზე მაღლა დაყენებით. უცენზურო ენით სავსე პუბლიკაციები მოკლებულია ზრდილობის ელემენტარულ ნორმებს, არღვევს ადამიანის ფუნდამენტურ უფლებებს და უხეშად შეურაცხყოფს მორწმუნეთა რელიგიურ გრძნობებს. ეს პოზიცია აშკარად პოლიტიკური მიზნებით არის ნაკარნახევი და წარმოადგენს სომხური ეკლესიისა და მისი სასულიერო პირების ავტორიტეტის დაკნინების მცდელობას, რომლებიც პატივისცემით სარგებლობენ ეროვნულ ცხოვრებაში და საერთაშორისო წრეებში, სურს ეკლესიის ხმის ჩახშობა და მისი სოციალური გავლენის შემცირება.
მთავრობის მეთაურის ანტიეკლესიური ქცევა, ეროვნული ღირებულებებისა და ეკლესიის წინააღმდეგ დაწყებული პროცესები სავსეა დამანგრეველი შედეგებით და საფრთხეს უქმნის სომხურ სახელმწიფოებრიობას, ჩვენი ხალხის ერთიანობას როგორც სამშობლოში, ასევე დიასპორაში. ასეთი ქმედებები ყოფს საზოგადოებას, ასუსტებს ერის სულისკვეთებას და პატრიოტიზმის მაღალ შეგნებას, განსაკუთრებით მიმდინარე გამოწვევების კონტექსტში. ასეთი ინიციატივები ემსახურება გარეშე არმენოფობიური ძალების ამბიციებს და გარკვეულწილად დაკავშირებულია აზერბაიჯანული პროპაგანდისტული მანქანის მიერ სომეხი ხალხისა და სომხური ეკლესიის მიმართ წაყენებულ ცილისწამებასა და ცრუ ბრალდებებთან. სომხური ეკლესია ურყევად გააგრძელებს ერის შენარჩუნების მისიას, წინააღმდეგობას გაუწევს დესტრუქციულ პროცესებს“, – ნათქვამია განცხადებაში.
სომხეთის უმაღლესმა სასულიერო საბჭო განცხადებაში აღნიშნავს, რომ ეკლესიის საკითხები წყდება ეკლესიის კანონების შესაბამისად და არ შედის მთავრობისა და პოლიტიკური ფიგურების იურისდიქციაში.
„ეკლესიის საკითხები წყდება ეკლესიის კანონების შესაბამისად და არ შედის მთავრობისა და პოლიტიკური ფიგურების იურისდიქციაში. სომხური სამოციქულო წმინდა ეკლესია თავისი მორწმუნეებითა და სასულიერო პირებით ერთიანია, რომელსაც სათავეში ყოველთა სომეხთა კათოლიკოსი უდგას. მოვუწოდებთ კომპეტენტურ სახელმწიფო ორგანოებს, შეწყვიტონ პრემიერ-მინისტრის ეს უკანონო და მოკლევადიანი პოლიტიკა. არ არის საჭირო ეკლესიის ხელოვნურ დღის წესრიგში ჩართვა და მისი წაქეზება საპასუხო მოქმედებებისკენ. ამ ახალი გამოწვევის წინაშე, ჩვენ მოვუწოდებთ ჩვენი წმინდა ეკლესიის მორწმუნეებს, გაერთიანდნენ და არ დაუშვან ეროვნული საფუძვლების შერყევა. ნუ გახდება ეს მიუღებელი მაქინაციები იმედგაცრუებისა და ცდუნების მიზეზი“, – აღნიშნულია განცხადებაში.
მანამდე, სომხეთის პრემიერ-მინისტრმა, ნიკოლ ფაშინიანმა განაცხადა, რომ თუ აღმოჩნდება, რომ გარეგინ II-მ მართლაც დაარღვია უქორწინობის აღთქმა და შვილი ჰყავს, ის ვერ იქნება ყოველთა სომეხთა კათოლიკოსი. ფაშინიანი ფიქრობს, რომ სომხეთის კათოლიკოსის არჩევისას სახელმწიფოს უნდა ჰქონდეს გადამწყვეტი სიტყვა.
0
0
