ნიუ იორკის სააპელაციო სასამართლომ გააუქმა 2020 წლის განაჩენი, რომლითაც ყოფილი კინო მაგნატი ჰარვი ვაინშტაინი გაუპატიურებაში დამნაშავედ ცნეს. როგორც NBC News წერს, სააპელაციო სასამართლომ დაადგინა, რომ პირველი ინსტანციის სასამართლომ ვაინშტაინს ზიანი მიაყენა „არასათანადო გადაწყვეტილებებით“, მათ შორის, იმით, რომ ქალებმა ჩვენებები მისცეს იმ ბრალდებებთან დაკავშირებით, რომლებიც არ წარმოადგენდა საქმის ნაწილს.
„სასამართლომ აღნიშნული შეცდომა გაამწვავა, როდესაც დაადგინა, რომ ამ ბრალდებებთან დაკავშირებით შეეძლო ჯვარედინი დაკითხვა გამოეყენებინა ბრალდებულის მიმართ, რომელსაც არ გააჩნდა კრიმინალური წარსული და აგრეთვე, მრავალი ისეთი ფაქტი მოეყვანა არასათანადო ქცევის შესახებ, რაც ბრალდებულს უაღრესად მავნე კუთხით წარმოაჩენდა“, - ნათქვამია სასამართლო დადგენილებაში.
მოსამართლე ჯენი რივერამ აღნიშნულს „უხეში შეცდომა“უწოდა და განაცხადა, რომ გამოსავალი ახალი სასამართლო განხილვის დაწყებაა. როგორც NBC News იუწყება, აღნიშნულის გამო, ჰარვი ვაინშტაინი შესაძლოა ჩვენების მისაცემად სასამართლოში დაიბარონ.
ადვოკატმა ლინდსი გოლდბრუმმა, რომელიც 72 წლის ვაინშტაინის ექვს მომჩივანს წარმოადგენს, ეს გადაწყვეტილება კანონის უზენაესობის კუთხით უკან გადადგმულ ნაბიჯად შეაფასა და განაცხადა, რომ ამან, მომავალში, შესაძლოა, სექსუალური ძალადობის მსხვერპლ ქალებს სარჩელის შეტანა გადააფიქრებინოს.
განაჩენს გამოეხმაურა მანჰეტენის ოლქის პროკურატურის სპიკერიც.
0
0