საქართველოს საგარეო საქმეთა მინისტრის, მაკა ბოჭორიშვილის განცხადებით, სამწუხაროა, რომ ევროკავშირსა და ბრიუსელში არიან წარმომადგენლები, რომლებიც გარკვეულწილად ნეგატიურ როლს თამაშობენ საქართველოში სტაბილურობის შენარჩუნებაში.

როგორც ბოჭორიშვილმა აღნიშნა, „ხშირად მათი განცხადებები მიმართულია სწორედ სტაბილურობის შერყევისკენ, რომელიც ასე სჭირდება ჩვენს ქვეყანას“.

„ძალიან სამწუხაროა, რომ ევროკავშირსა და ბრიუსელში არიან წარმომადგენლები, რომლებიც ძალიან ვიწროდ უყურებენ დღევანდელი მსოფლიოს განვითარებებს. ძალიან სუბიექტურად აფასებენ საქართველოში მიმდინარე პროცესებს და შეიძლება ითქვას, გარკვეულწილად ნეგატიურ როლსაც თამაშობენ ჩვენს ქვეყანაში სტაბილურობის შენარჩუნებაში. ძალიან ხშირად მათი განცხადებები მიმართულია სწორედ იმ სტაბილურობის შესარყევად, რომელიც ასე სჭირდება ჩვენს ქვეყანას“, – აღნიშნა მაკა ბოჭორიშვილმა.

ცნობისთვის, ევროკავშირის უმაღლესმა წარმომადგენელმა, კაია კალასმა ბრიუსელში საგარეო საქმეთა მინისტერიალის დაწყებამდე განაცხადა: „ძალიან შეშფოთებულები ვართ საქართველოში ადამიანების დაკავებების გამო. ვახორციელებთ ზეწოლას იმ ადამიანებზე, ვინც ჩადის ძალადობას მშვიდობანი დემონსტრანტების წინააღმდეგ“.

ასევე წაიკითხეთ:

ცნობილი ხდება საქართველოს საგარეო საქმეთა მინისტრის მაკა ბოჭორიშვილისა და აშშ-ის ეროვნული დაზვერვის დირექტორის ტულსი გაბარდის მოკლე აუდიენციის შესახებ  Raisina Dialogue-ის კონფერენციაზე