სამი პროფესიონალი სამ საკვანძო თანამდებობაზე. იცით, რომ ბატონ გრიგოლს ეწურებოდა რამდენიმე თვეში ვადა, მეორედ მისი არჩევა კანონის მიხედვით შეუძლებელი იყო, ამიტომ იყო მიღებული პრემიერ-მინისტრის მიერ ეს გადაწყვეტილება, რომ კიდევ უფრო გაძლიერდეს რეგიონული მართვის მიმართულებით მენეჯმენტი, კონტროლი, – ამის შესახებ „ქართული ოცნების“ აღმასრულებელმა მდივანმა, მამუკა მდინარაძემ განაცხადა.
მდინარაძის განცხადებით, სამ უმნიშვნელოვანეს თანამდებობას დაიკავებენ ის ადამიანები, რომლებიც კონკრეტული მიმართულებით კიდევ მეტ წარმატებას მოაღწევენ.
„ჩვენ ამბიციური გეგმები გვაქვს გამოცხადებული იმასთან დაკავშირებით, რომ მსოფლიოში ერთ-ერთი პირველები უნდა ვიყოთ კორუფციასთან ბრძოლის თვალსაზრისით და ამ გეგმების თანმიმდევრულად მიყოლა და მენეჯმენტი გამართლებულია სწორედ ამ გადაწყვეტილებით. კიდევ ერთხელ გავიმეორებ, სამ უმნიშვნელოვანეს და საკვანძო თანამდებობას დაიკავებენ ის ადამიანები, რომლებიც კონკრეტული მიმართულებით წარმატებას მოაღწევენ კიდევ მეტს, რადგან მათი ბექგრაუნდი, მათი წარსული საქმიანობა ამაზე მეტყველებს“, – განაცხადა მდინარაძემ.
საკადრო ცვლილებების თანახმად, ცალკე სამინისტროდ ჩამოყალიბდება რეგიონული განვითარების სამინისტრო, რომელსაც გრიგოლ ლილუაშვილი უხელმძღვანელებს, სახელმწიფო უსაფრთხოების სამსახურის უფროსის თანამდებობაზე პარლამენტს ანრი ოხანაშვილის კანდიდატურა წარედგინება, იუსტიციის მინისტრის თანამდებობას კი პაატა სალია დაიკავებს.
0
0
