კუბის სამხრეთ-აღმოსავლეთ სანაპიროსთან ამერიკული ატომური წყალქვეშა ნავი მივიდა. ეს ფაქტი ჰავანის პორტში რუსული სამხედრო ხომალდების ვიზიტიდან ერთ დღეში მოხდა. ინფორმაციას Deutche Welle  ავრცელებს.

„მოიერიშე წყალქვეშა ნავი USS Helena გუანტანამოს ყურეში იმყოფება პორტის გეგმური ვიზიტის ფარგლებში“ - დაწერა X-ში აშშ-ის სამხრეთ მეთაურობა. ამერიკელი სამხედროები აცხადებენ, რომ წყალქვეშა ნავის ვიზიტი წინასწარ იყო დაგეგმილი.

როგორც პენტაგონის ოფიციალური წარმომადგენლის მოადგილემ საბრინა სინგჰმა განაცხადა, კუბაში რუსული ხომალდების ვიზიტი აშშ-სთვის საფრთხეს არ წარმოადგენს, მაგრამ ამერიკული მხარე სამხედრო გემების გადაადგილებას აკვირდება. სინგჰის თქმით, რუსული გემები კუბაში ადრეც იმყოფებოდნენ.