The Associated Press-ის ინფორმაციით, ნატოს ორი წევრი სახელმწიფოს სადაზვერვო სამსახურები ეჭვობენ, რომ რუსეთი ახალ იარაღს ამზადებს, რომელსაც შეუძლია SpaceX-ის Starlink-ის თანამგზავრული ქსელის დაშლა. ამ ნაბიჯმა შესაძლოა კოსმოსურ სივრცეში დასავლეთის უპირატესობა შეარყიოს და უკრაინის საომარი კომუნიკაციები გაანადგუროს.

„იარაღი Starlink-ის ორბიტალურ ფენას მიკროსკოპული ფრაგმენტებით დაუმიზნებს, რაც პოტენციურად ერთდროულად მრავალ თანამგზავრს დააზიანებს და სხვა ორბიტალურ სისტემებს კასკადურ ზიანს მიაყენებს. თუმცა, რამდენიმე ანალიტიკოსი სკეპტიკურადაა განწყობილი, რომ ასეთი იარაღის გამოყენება შესაძლებელია სხვა ქვეყნებისა და კომპანიების, მათ შორის რუსეთისა და მისი მოკავშირე ჩინეთის კუთვნილი თანამგზავრების ფართომასშტაბიანი შეფერხების გარეშე, რომლებიც კომუნიკაციისა და თავდაცვისთვის ათასობით თანამგზავრზე არიან დამოკიდებულნი. ექპერტები აღნიშნავენ, რომ მოსკოვის კოსმოსური აქტივების მიმართ პოტენციური რისკი შესაძლოა ხელს უშლიდეს მის განლაგებას ან გამოყენებას.

კანადის საჰაერო ძალების კოსმოსური ძალების მეთაურმა კრისტოფერ ჰორნერმა განაცხადა, რომ სცენარის გამორიცხვა შეუძლებელია, აშშ-ის ადრეული გაფრთხილებების გათვალისწინებით, რომლებიც მიუთითებდა, რომ რუსეთი კოსმოსში ბირთვული იარაღის განლაგებას ცდილობდა. ამავდროულად, ჰორნერმა ხაზგასმით აღნიშნა, რომ Starlink-ის თანამგზავრზე თავდასხმის შედეგად წარმოქმნილი ნარჩენების ტრაექტორიის კონტროლი თითქმის შეუძლებელი იქნება. 

სადაზვერვო შეფასებების თანახმად, ფრაგმენტები მხოლოდ მილიმეტრების ზომის იქნება, რაც თავდასხმის წყაროს იდენტიფიცირებას გაართულებს,“ - წერს The Associated Press-ი.

როგორც ცნობილია, მოსკოვი მილიარდერ ილონ მასკის საკუთრებაში არსებულ თანამგზავრულ ქსელს სერიოზულ საფრთხედ მიიჩნევს. Starlink-ის დაბალ ორბიტაზე მდებარე ათასობით თანამგზავრმა გადამწყვეტი როლი ითამაშა უკრაინის ფუნქციონირების უნარში რუსეთის სრულმასშტაბიანი შემოჭრის დროს - უზრუნველყო მაღალსიჩქარიანი ინტერნეტი საბრძოლო ველზე კომუნიკაციისთვის, იარაღის დამიზნებისა და სამოქალაქო გამოყენებისთვის.