სირიამ ლიბანის საზღვართან ათასობით ჯარისკაცი გაგზავნა, – ამის შესახებ „როიტერი“ წერს.

სირიის თავდაცვის სამინისტრომ განაცხადა, რომ ლიბანთან საზღვარი გააძლიერა, ხოლო როგორც „როიტერი“ რვა ანონიმურ წყაროზე დაყრდნობით წერს, ეს მოიცავს სარაკეტო დანაყოფებს და ათასობით ჯარისკაცს.

სირიის თავდაცვის სამინისტროს მიერ გავრცელებულ განცხადებაში ნათქვამია, რომ არმიამ გააძლიერა თავისი განლაგება სირიის საზღვრებთან ლიბანთან და ერაყთან, როგორც „რეგიონული კონფლიქტის ესკალაციის ფონზე საზღვრების დაცვისა და კონტროლის“ ძალისხმევის ნაწილი.

განლაგებულ დანაყოფებს მიეკუთვნებიან სასაზღვრო დაცვისა და სადაზვერვო ბატალიონები, რომლებსაც სასაზღვრო საქმიანობის მონიტორინგი და კონტრაბანდის წინააღმდეგ ბრძოლა ევალებათ. სირიელმა ოფიცრებმა, მათ შორის სამხედრო მაღალჩინოსანმა, განაცხადეს, რომ ეს ნაბიჯი მიზნად ისახავდა იარაღისა და ნარკოტიკების კონტრაბანდის თავიდან აცილებას, ასევე ირანის მიერ მხარდაჭერილი დაჯგუფება „ჰეზბოლას“ ან სხვა მებრძოლების სირიაში შეღწევის დაბლოკვას.

სირიის უსაფრთხოების წარმომადგენელმა განაცხადა, რომ დამასკოს არ აქვს რომელიმე მეზობელი ქვეყნის წინააღმდეგ სამხედრო მოქმედების გეგმები, „თუმცა, სირია მზადაა, გაუმკლავდეს ნებისმიერ საფრთხეს საკუთარი ან მისი პარტნიორების მიმართ“.