პრეზიდენტის გასამართლება და გადაყენება იმისთვის, რომ იგი მაკრონს შეხვდა და წავიდა ევროპაში, ძალიან ცუდია საქართველოს რეპუტაციისთვის, - ამის შესახებ პოლიტიკური ჯგუფის „ევროოპტიმისტების“ წევრმა, ხატია დეკანოიძემ განაცხადა.

„მე არავითარი კითხვები არ მაქვს. ჩემთვის ეს არის მთლიანად ძალიან რთული პროცესი. თუ პრეზიდენტს სურს, რომ არც განხილვაზე და არც კენჭისყრაზე ოპოზიცია არ შევიდეს და მარტო იყოს და მარტო გასცეს კითხვებს პასუხები, რა თქმა უნდა, მე შემიძლია გავითვალისწინო მისი ეს სურვილი მარტივად“, - განმარტა ხატია დეკანოიძემ.

დღეს პარლამენტში პრეზიდენტის იმპიჩმენტის საკითხს განიხილავენ. სხდომას დაესწრება თავად სალომე ზურაბიშვილიც. წინასწარ ცნობილია, რომ იმპიჩმენტს საპარლამენტო უმრავლესობა და „ევროპელი სოციალისტები“ დაუჭერენ მხარს.