დოლიძის ქუჩაზე მომხდარი მკვლელობის ახალი დეტალები ხდება ცნობილი. გარდაცვლილთა მეზობლების ინფორმაციით, ოჯახი დოლიძის 27 ნომერში საცხოვრებლად ახალი გადასული იყო.
მათი ნაწილი ამბობს, ქვედა სართულიდან გაიგეს ქალის ტირილი, ამის შემდეგ კი იარაღიდან ოთხჯერ გასროლის ხმა. ნაწილი კი ამბობს, რომ გასროლის ხმა საერთოდ არ გაუგიათ.
მეზობლების განმარტებით, მომხდარის მიზეზებზე არაფერი იციან. იციან გარდა იმისა' რომ წყვილი განქორწინებული იყო.
მათივე ცნობით, შემთხვევა, დაახლოებით, ღამის 12:00 საათზე მოხდა.
„ბავშვები ტიროდნენ და იძახდნენ, „მამა არ გაპატიებთ”. სასწრაფო იყო მოსული, შემდეგ ამ ბავშვებს აწყნარებდნენ. ორი ბავშვი იყო, ერთი, დაახლოებით, 15 წლამდე, მეორე მასზე უმცროსი. ვიფიქრე, ალბათ, ოჯახური კონფლიქტი იყო, თუ მიცვალებულები იყვნენ ეგ ნამდვილად არ ვიცი. რაც შეეხება დაჭრილ მამაკაცს, მას გადაადგილება თვითონ არ შეეძლო. მაშველებს გამოუძახეს, სასწრაფოს და შემდეგ სასწრაფომ წაიყვანა. ისიც არ ვიცოდი, რომ ორი (გარდაცვლილი) იყო. მე გავიგე ბავშვების ხმა,რომლებიც დედის სახელს იძახდნენ. იქ თუ ბებიაც იყო, ეს ნამდვილად არ ვიცოდი. ამბობენ, რომ ეს ოჯახი აქ სამი თვეა რაც აქ ცხოვრობს. ახლა გავიგე, რომ ყოფილი მეუღლე იყო [ბრალდებული მამაკაცი]. ყველაფერი მოხდა უხმაუროდ. რომ არ მოსულიყო საპატრულო პოლიცია და ვერაფერს გავიგებდი. არც გასროლა გაგვიგია, სახლში ვიყავი… ის ბავშვები თუ გამოვიდნენ მდგომარეობიდან, არ ვიცი“, - განაცხადა ერთ-ერთმა მეზობელმა შორენა ჟვანიამ.
გარდა ამისა, გავრცელებული ინფორმაციით, მკვლელობის დროს ბინაში, სიდედრის, ყოფილი მეუღლისა და შვილების გარდა კიდევ ერთი პირი იმყოფებოდა.
პოლიციელი, რომელმაც დედაქალაქის ცენტრში ყოფილი ცოლი და სიდედრი მოკლა, გურამ ქადეიშვილია.
შსს-ს მოქმედი თანამშრომელი ახლა ხეჩინაშვილის კლინიკის რეანიმაციულ განყოფილებაშია მოთავსებული.
არსებული ინფორმაციით, მკვლელობას უმძიმეს დანაშაულში ბრალდებული კაცისა და მოკლულის, ვერონიკა ქუმსიაშვილის არასრულწლოვანი შვილები, 13 და 15 წლის მოზარდები შეესწრნენ. საქმის ოქროს მოწმეა ერთი პირი, რომელიც სროლის დროს ტუალეტში იყო ჩაკეტილი.
0
0
