თბილისის საკრებულოს ქონების მართვისა და საფინანასო-საბიუჯეტო კომისიის თავმჯდომარე, ნაძალადევის რაიონის მაჟორიტარი ირაკლი ხელაძე, “ტვ პირველის” მიერ გავრცელებულ ინფორმაციას გამოეხმაურა და ნაძალადევის რაიონში დაგეგმილ პროექტთან დაკავშირებით განმარტება გააკეთა.

მისი თქმით, რომელაშვილის ქუჩაზე გზის მონაკვეთის დაზიანება, კოროზირებულმა წყალსადენის მილმა გამოიწვია და გზის სავალი ნაწილის ჩამოშლა კავშირში არ არის სკვერის მშენებლობასთან. 

"სამწუხაროა, როდესაც მედიასაშუალების მხრიდან საზოგადოების შეცდომაში შეყვანის მცდელობას ვხედავთ. ერთ-ერთმა ოპოზიციურმა ტელეკომპანიამ გაავრცელა არასწორი ინფორმაცია, თითქოს რომელაშვილის ქუჩაზე გზის გარკვეული მონაკვეთის დაზიანება თემქის ხევში საქალაქო პარკის მშენებლობის სამუშაოებმა გამოიწვია. მინდა, საზოგადოებას მივაწოდო რეალური და სწორი ინფორმაცია.

 
ზღვისუბანში, რომელაშვილის ქუჩაზე ნაძალადევის რაიონის გამგეობა ახორციელებდა გამაგრების სამუშაოებს. ტერიტორიაზე გადიოდა წყალსადენის მილი. სამუშაო პროცესში აღმოჩნდა, რომ მილი იყო კოროზირებული და დაზიანებული, რამაც გამოიწვია გრუნტისა და გზის სავალი ნაწილის ჩამოშლა. სწორედ ეს იყო მიზეზი და არა თემქის ხევში მიმდინარე სამუშაოები.

კედლის მშენებლობისა და გზის რეაბილიტაციის დასრულების გახანგრძლივება სწორედ ამ გაუთვალისწინებელმა გარემოებამ გამოიწვია. ამ დროისთვის კომპანია „ჯორჯიან უოთერ ენდ ფაუერი“ ცვლის დაზიანებულ მილს, რისთვისაც საჭირო გახდა დამატებით გზის გაჭრა. GWP სამუშაოებს, დაახლოებით, 10 დღეში დაასრულებს და შემდეგ გამგეობა გააგრძელებს გრუნტის დამჭერი კედლის მშენებლობას.

 ამ ეტაპზე ბეტონი ჩასხმულია 50 მ სიგრძეზე, დარჩენილია კიდევ 50-მეტრიანი საყრდენი კედლის მოწყობა. გამაგრების სამუშაოების დასრულების შემდეგ, საგზაო ინფრასტრუქტურა მოწესრიგდება. ამ პროექტისთვის გამგეობამ ბიუჯეტიდან 800 ათას ლარზე მეტი გამოყო.
 გვესმის, რომ მოქალაქეებს პრობლემა შეექმნათ, რადგან აღნიშნულ მონაკვეთზე სატრანსპორტო მოძრაობა შეზღუდულია. ადგილობრივ მოსახლეობას ბოდიშს ვუხდით შექმნილი დისკომფორტისთვის, თუმცა ზემოთ ჩამოთვლილი სამუშაოები, პირველ რიგში, მათი საცხოვრებელი გარემოს გაუმჯობესებისთვის არის მნიშვნელოვანი.

 

რაც შეეხება თემქის ხევს, მინდა, საზოგადოებას კიდევ ერთხელ მივაწოდო ინფორმაცია ამ პროექტის შესახებ, რომელსაც უდიდესი მნიშვნელობა აქვს ზღვისუბნისა და მთლიანად ნაძალადევის რაიონის განვითარებისთვის. ახალი საქალაქო პარკის მშენებლობა 25 ჰექტარზე მიმდინარეობს. სამუშაოების ღირებულება, დაახლოებით, 40 მილიონი ლარია. პარკის მშენებლობის დასრულება მიმდინარე წლის შემოდგომაზე იგეგმება", - წერს ირაკლი ხელაძე.

შეგახსენებთ, რომ “ტვ პირველის” ინფორმაციით,  რომელაშვილის ქუჩის მოსახლეობა ამბობს, რომ გზის სავალი ნაწილი მას შემდეგ დაინგრა, რაც მერიამ გზის გვერდით არსებულ ხევში დაიწყო სამუშაოები.