უკრაინის ეროვნულმა პოლიციამ დააფიქსირა რუსეთის ფედერაციის სრულმასშტაბიანი აგრესიის შედეგად უკრაინაში 9700 მშვიდობიანი მოქალაქის დაღუპვა, თითქმის 7 ათასი მშვიდობიანი მოქალაქე უგზო-უკვლოდ დაკარგულად მიიჩნევა. 

ამის შესახებ უკრაინის ეროვნული პოლიციის თავმჯდომარის პირველმა მოადგილემ მაქსიმ ცუცქირიძემ სააგენტო ინტერფაქსი-უკრაინასთან ინტერვიუში განაცხადა. 

„პოლიციამ პირდაპირ დააფიქსირა 9700 უკრაინელის გარდაცვალების ფაქტი, კიდევ 11 000 დაშავდა და თითქმის 7000 უგზო-უკვლოდ დაკარგულად ითვლება. ეს ყველა მშვიდობიანი მოქალაქეა“, - თქვა მან.

მისი თქმით, დაიღუპა 522 ბავშვი, 14 ათასი უკრაინელი ბავშვი დეპორტირებულია რუსეთსა და ბელარუსში.