საქართველოს მოქალაქე ირაკლი ბებუა, რომელიც 2020 წელს დააკავა ოკუპირებული აფხაზეთის დეფაქტო ხელისუფლებამ და ცხრა წლით თავისუფლების აღკვეთა მიუსაჯეს , 2025 წლის 30 მარტს გაათავისუფლებენ. ამის შესახებ ოკუპირებული აფხაზეთის ე.წ. შინაგან საქმეთა სამინისტროს ხელმძღვანელმა რობერტ კიუტმა განაცხადა.

კიუტმა უარყო ინფორმაცია იმის შესახებ, რომ ბებუა დაკავების დაწესებულებას ვადამდე დატოვებს.

„ის 2020 წლის 30 სექტემბერს დააკავეს. ეს ფაქტი ალბათ ყველამ იცის, მან ჩაიდინა ქმედება, როცა სახელმწიფო დროშა დაწვა, რისთვისაც სისხლის სამართლის პასუხისმგებლობა დაეკისრა 9 წლის ვადით. ჯამში ის 4 წელი და 6 თვე უნდა მჯდარიყო. ეს ყველაფერი (ხდება) იმ მუხლის შესაბამისად, რაც მას სასამართლომ დაუნიშნა“, - აღნიშნა კიუტმა.