ნიკა გვარამიამ სოციალურ ქსელში, ოპონენტების მისამართით, ტერმინი "პოლიტიკური აუტისტები" გამოიყენა.

"მთლად "პოლიტიკური აუტისტები" მაინც ნუ ილაპარაკებთ ყველასთვის ხელის ჩამორთმევაზე და შეხვედრებზე, ვინმე ცინიკოსმა აბუჩად არ აგიგდოთ", - დაწერა გვარამიამ.

პოსტს გამოეხმაურა ადამიანის უფლებათა დაცვის კომიტეტის თავმჯდომარე. "აუტიზმის გამოყენება შეურაცხმყოფელ კონტექსტში არის დისკრიმინაცია და საბჭოთა მენტალიტეტის გამოვლინება", - წერს რატი იონათამიშვილი. მისი შეფასებით, ეს გვარამიას მხრიდან შშმ პირებზე თავდასხმის პირველი შემთხვევა არ არის.

დეპუტატმა ნიკა გვარამიას "ნაციონალური მოძრაობის" მმართველობის პერიოდი შეახსენა, როდესაც, მისი თქმით, ინკლუზიური განათლების ბიუჯეტი და ადაპტირებული ტრანსპორტის რაოდენობა ქვეყანაში "ნულის ტოლი იყო".