ნეპალში წვიმისგან ადიდებულ მდინარეში ტურისტული ავტობუსი ჩავარდა, რასაც, სულ მცირე, 27 ადამიანი ემსხვერპლა, 16 კი დაშავდა. როგორც ნეპალის პოლიციის სპიკერი, შაილენდრა თაფა იუწყება, ავტობუსს 43 ინდოელი ტურისტი გადაჰყავდა.

სამძებრო-სამაშველო სამუშაოების შედეგად მაშველებმა მარსიანგდის მდინარიდან 22 ადამიანი გადაარჩინეს, რომელთაგან 12 სერიოზულად იყო დაშავებული და საჰაერო გზით საავადმყოფოში გადაიყვანეს.

თაფას თქმით, საავადმყოფოში, სულ მცირე, 6 ადამიანი დაიღუპა.

სპიკერის ცნობით, ტურისტებს გეზი ნეპალის დედაქალაქ კატმანდუსკენ ჰქონდათ აღებული.

ინდური  მედიის ინფორმაციით, ინდოეთის შტატმა, სადაც ტურისტები ავტობუსზე ავიდნენ, შემთხვევის ადგილას სამაშველო სამუშაოების კოორდინირებისთვის ოფიციალური წარმომადგენელი გაგზავნა.