მუშაობის პროცესი შედგა, მიზანი იყო ყველასთვის გვეჩვენებინა, რომ შეგვიძლია ერთად დასხდომა, მუშაობა, - ამის შესახებ ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ მიხეილ სარჯველაძემ „ქრონიკაში“ განაცხადა.

მისი თქმით, ოპოზიციასთან შეხვედრაზე ისეთი გარემო იყო, რომ ფიქრობს ამ შეხვედრამ გაამართლა.

„დახურული იყო შეხვედრა, წარიმართა მშვიდად, აუღელვებლად, გართულებების გარეშე და იყო კონსტრუქციული ლაპარაკი. ჩვენი მხრიდან საუბარი ეხებოდა იმას, რომ ჩვენ გვაქვს სამუშაო კონკრეტულ საკითხებზე და მოდით, შევეშვათ განყენებული, ზოგადი შეფასებების ტირაჟირებას და დავიწყოთ კონკრეტულ საკითხებზე მუშაობა. სასამართლოსთან დაკავშირებით, რაც არის გეგმაში და კეთდება კონკრეტული კანონპროექტების სახით, არის რეალურად გაუმჯობესების შესაძლებლობა. სადაც აღმოვაჩინეთ, ყველგან ამას ვაკეთებთ. თუ დამატებით ვინმეს რამე აქვს ინიციატივა, დაე ვიფიქროთ ამ თემასთან დაკავშირებით. გავცვალეთ მოსაზრებები იმასთან დაკავშირებითაც, რომ მე პირადად, როგორც იურისტს, მაქვს შეხედულება, რომ „ვეტინგის“ იდეა არ არის მაინც და მაინც სასარგებლო, რადგან ამას შეუძლია გააფუჭოს ის, რასაც ჰქვია სასამართლო ხელისუფლების დამოუკიდებლობა. „ვეტინგი“ იყო ის, რაც მოხდა 2004 წელს სააკაშვილმა რაც გააკეთა და გახსოვთ მაშინ რა მდგომარეობაში აღმოჩნდა სასამართლო ხელისუფლება და მისი დამოუკიდებლობა. ახლა იმავეს გამეორება იგივე საფრთხეების მაუწყებელი შეიძლება იყოს და რა საკვირველია, ეს სახიფათოა. ამის თაობაზე მოსაზრებები გავცვალეთ. შესაბამისად, ველოდებით, რომ კონკრეტული ინიციატივები, იდეები იქნება. მთავარია, მუშაობის პროცესი შედგა. მიზანი იყო ყველასთვის გვეჩვენებინა, რომ შეგვიძლია ერთად დასხდომა, მუშაობა. ამ კუთხით ხელისუფლებამ გადადგა ნაბიჯი და პრაქტიკულად უდავო გახადა ის გარემოება, რომ ხელისუფლება განწყობილია პოზიტიურად, რომ ყველას მიეცეს ჩართულობის შესაძლებლობა, ვისაც ამის სურვილი აქვს“,- აღნიშნა სარჯველაძემ.