ჩვენ ზოგადად მიგვაჩნია - ვისაც ჯარში არ უნდა, იმას ჯარში რა უნდა?! - ამის შესახებ „გირჩის“ ერთ-ერთმა ლიდერმა იაგო ხვიჩიამ თავდაცვის კოდექსში შესატან ცვლილებებთან დაკავშირებით განაცხადა.

მისი განმარტებით, ადამიანების იძულებით ჯარში გაწვევა, არ შეიძლება იყოს ჯარის გაძლიერებისკენ მიმართული.

„ჩვენი მოთხოვნა არის ძალიან მარტივი, არა სავალდებულო სამხედრო სამსახურს! არა მონობას, სადაც ადამიანებს იძულებით უფასოდ ამუშავებენ „ვიშკაზე“ და შლაგბაუმის გამღებად, ყარაულებად. აი, ამას ვაპროტესტებთ და ვამბობთ, რომ ეს არ შეიძლება იყოს ქართული ჯარის გაძლიერებისკენ მიმართული რეფორმა. ზოგადად ის, რომ ჯარისკაცის გვერდზე თანაბარ მდგომარეობაში დეზერტირობაზე მეოცნებეს ამყოფებ, ეს არ შეიძლება იყოს ჯარის პატივისცემა. ადამიანს არ უნდა გაუხადო საქმე ისე, რომ დეზერტირობაზე ოცნებობდეს იმიტომ, რომ ჯარში ძალით მიგყავს. ამ ქვეყანაში საკმარისად არიან ადამიანები, რომლებსაც უნდათ და ოცნებობენ ჯარისკაცობაზე, ჩვენ იმათ შევუქმნათ პირობები და არავის ჯარში წაყვანა არ მოგვიწევს“, - განაცხადა იაგო ხვიჩიამ.

ცნობისთვის, დღეს, 11 მარტს, 17:00 საათზე, პარლამენტთან აქციაა დაანონსებული, სადაც სავალდებულო სამხედრო სამსახურს გააპროტესტებენ.