"ერთიანი ნაციონალური მოძრაობის" ყოფილი თავჯდომარის ნიკა მელიასა და "მთავარი არხის" დამფუძნებლის, ნიკა გვარამიას პოლიტიკური გუნდების შემაჯამებელი შეხვედრა დღეს, 11 მარტს გაიმართება. შეხვედრაზე გამოცხადდება საბოლოო გადაწყვეტილება.

"14:00 საათზე, სასტუმრო "შერატონში" გაიმართება მელია-გვარამიას პოლიტიკური გუნდების შემაჯამებელი შეხვედრა და გამოცხადდება საბოლოო გადაწყვეტილება",- აცხადებენ პრესსამსახურში.

რამდენიმე დღის წინ ნიკა მელიამ სოციალურ ქსელში დაწერა, რომ "2024 წლის არჩევნებზე აუცილებლად მოხდება გარდამტეხი ცვლილებები ქვეყნის და ხალხის ინტერესების შესაბამისად!" მელიას თქმით, "დიდ ნაბიჯს წინ მომავლისკენ და ექნება თავისი სიმბოლო - ნომერი 4".

საკუთარი გუნდის შესახებ სოციალურ ქსელში რამდენჯერმე განაცხადა ნიკა გვარამიამაც, მის მიერ გავრცელებული ბოლო ცნობებით, ნიკა გვარამიას პოლიტიკურ გუნდს, “ახალი”, კიდევ რამდენიმე წევრი შეემატა, მათ შორის, “ქართული ოცნების” ყოფილი წევრი, გედევან ფოფხაძე.

ნიკა გვარამიას პოლიტიკურ გუნდს, “ახალს”, ახალი წევრები ჰყავს. მათ შორის, “ქართული ოცნების” ყოფილი წევრი გედევან ფოფხაძე.

“ჩემი დიდი ხნის საამაყო მეგობრები: გედი და პროფესორები. გამარჯობა, ახლებო”, – წერს გვარამია ფეისბუკის პირად გვერდზე ფოტოს თანხლებით, სადაც მასთან და გედევან ფოფხაძესთან ერთად დგანან ივანე წერეთელი, თეიმურაზ პაპასქირი და გიორგი ლომიძე.

გედევან ფოფხაძე იყო საქართველოს პარლამენტის მერვე მოწვევის წევრი “ბიძინა ივანიშვილი – ქართული ოცნება” სიით, 2012-2016 წლებში. იყო მეცხრე მოწვევის პარლამენტის წევრიც, ისევ “ქართული ოცნების” სიით 2016-2020 წლებში. ფოფხაძემ “ქართული ოცნება” 2019 წლის თებერვალში დატოვა და მოგვიანებით, ეკა ბესელიას ახლად შექმნილ პარტიაში გაწევრიანდა, რომელიც 2019 წლის აგვისტოში ასევე დატოვა. ამის შემდეგ იგი მარიამ ჯაშის, ლევან გოგიჩაიშვილისა და ბექა ნაცვლიშვილის პარტიას, “ჩვენი საქართველო – სოლიდარობის ალიანსს” შეუერთდა. თუმცა 2020 წლის ნოემბერში ცნობილი გახდა, რომ ფოფხაძემ “სოლიდარობის ალიანსიც” დატოვა. 2021 წელს სოლიდარობა გამოუცხადა “ნაციონალური მოძრაობის” მაშინდელ თავმჯდომარე ნიკა მელიას, მის მიმართ განხორციელებული სამართლებრივი დევნის გამო. ამავე წელს შეუერთდა მიხეილ სააკაშვილის გათავისუფლების მოთხოვნით აქციას.

თეიმურაზ პაპასქირი ივანე ჯავახიშვილის სახელობის თბილისის სახელმწიფო უნივერსიტეტის პროფესორი, ისტორიის დოქტორია.

გიორგი ლომიძე, “რა? სად? როდის?” კლუბის წევრი და “ნიკა გვარამიას თავისუფლების მოძრაობის” წევრი იყო.

ფოტოზე ახალ წევრებთან დგას ივანე წერეთელი, რომელიც ასოცირებული პროფესორი, თსუ-ს კულტურის კვლევების სასწავლო–სამეცნიერო ინსტიტუტის წევრია. ივანე წერეთელი რომ ნიკა გვარამიას პოლიტიკურ პლატფორმას შეუერთდა, ამის შესახებ ცნობილი რამდენიმე კვირის წინ გახდა.

ნიკა გვარამიას პოლიტიკურ გუნდს, “ახალს”, ყოფილი მოსამართლე, მაია კოპალეიშვილიც შეუერთდა. მაია კოპალეიშვილი იცავდა სალომე ზურაბიშვილის ინტერესებს საკონსტიტუციო სასამართლოში, როცა “ქართულმა ოცნებამ” მისი პრეზიდენტის იმპიჩმენტის საკითხი დააყენა დღის წესრიგში.