როგორც ,,ჰამასმა“ განაცხადა, მძევლები არ გათავისუფლდებიან, სანამ ისრაელი "აგრესიის სრულ შეწყვეტაზე" არ დათანხმდება.

გასულ თვეში დადებული ზავის შედეგად, ,,ჰამასმა“ 100-ზე მეტი მძევალი გაათავისუფლა, თუმცა, 7 ოქტომბერს ისრაელიდან ღაზაში გატაცებული კიდევ 120 ადამიანი კვლავ ტყვეობაში იმყოფება.

,,პალესტინური ფრაქციების ეროვნული გადაწყვეტილებით, მძევლების გათავისუფლების ან მათი გაცვლის გარიგებების საკითხი არ განიხილება, სანამ ისრაელი აგრესიას სრულად არ შეწყვეტს,“ - ნათქვამია ,,ჰამასის“ განცხადებაში.

გაურკვეველია, რომელი პალესტინური ფრაქციები იგულისხმებოდა ,,ჰამასის“  განცხადებაში. ღაზას სექტორში მოქმედი მცირე დაჯგუფება ისლამური ჯიჰადი მათ შორისაა, რომლებმაც ასევე ისრაელელები მძევლად აიყვანა.

როგორც BBC-ი წერს, ,,ჰამასის“ განცხადება ისრაელის მთავრობას მძიმე მდგომარეობაში აყენებს. მთავრობის თქმით, მძევლების გათავისუფლების საუკეთესო გზა ,,ჰამასზე“ სამხედრო ზეწოლა და სამაშველო ოპერაციების მოწყობაა.