მაროკოში 50 წლის შემდეგ, პირველად, თოვლი მოვიდა. ამის შესახებ ადგილობრივი ტელეარხი Maghreb Arabe Press იტყობინება.

მაროკოს ეროვნული მეტეოროლოგიური ცენტრი უდაბნოს რეგიონისთვის უჩვეულო ამინდის პირობებს ჩრდილოეთ ევროპიდან ცივი ჰაერის მნიშვნელოვან შემოდინებას მიაწერს.

ძლიერმა თოვლმა მოიცვა ქვეყნის რამდენიმე პროვინცია სამხრეთ და სამხრეთ-აღმოსავლეთში: აზილალი, ბენი მელალი, იფრანი, მიდელტი, ტარუდანტი, თინჰირი, ოვარზაზატე და ალ-ჰაუზი. თოვლის საფარის სიმაღლე ზოგიერთ რაიონში 35-40 სანტიმეტრს აღწევდა.

ზოგან მთიან რაიონებში ჰაერის ტემპერატურა -5 გრადუსამდე დაეცა.

არხის ცნობით, ბევრი ადგილობრივი მაროკოელი მოვიდა სამთო კურორტ ოუკაიმდენში, რომელიც მდებარეობს მარაქეშიდან ერთი საათის სავალზე, თხილამურებზე და სნოუბორდზე სასრიალოდ.