როგორც The Associated Press-ი იუწყება, აშშ-ის სახელმწიფო მდივანი მარკო რუბიო და რუსეთის საგარეო საქმეთა მინისტრი სერგეი ლავროვი მალაიზიის დედაქალაქ კუალა-ლუმპურში ერთმანეთს შეხვდებიან და სამხრეთ-აღმოსავლეთ აზიის ქვეყნების ასოციაციის ყოველწლიურ რეგიონულ ფორუმს დაესწრებიან. ფორუმი ასეანის [ASEAN] 10 წევრს და მათ უმნიშვნელოვანეს დიპლომატიურ პარტნიორებს, მათ შორის რუსეთს, ჩინეთს, იაპონიას, სამხრეთ კორეას, ევროპასა და აშშ-ს აერთიანებს.

თანამდებობის დაკავების შემდეგ, მარკო რუბიო სერგეი ლავროვს პირისპირ მეორედ შეხვდება. მათი პირველი შეხვედრა თებერვალში, საუდის არაბეთში, რიადში შედგა, როდესაც ტრამპის ადმინისტრაცია რუსეთ-უკრაინას შორის მშვიდობის დამყარების გზების პოვნას ცდილობდა.