ვოლოდიმირ ზელენსკის მარჯვენა ხელის, ანდრიი ერმაკის გადადგომის შემდეგ, ევროკავშირი უკრაინაში უმნიშვნელოვანეს თანამოსაუბრეს კარგავს მაშინ, როდესაც პოტენციური სამშვიდობო შეთანხმების მოლაპარაკებები მიმდინარეობს, ხოლო ტრამპის ადმინისტრაცია, პირიქით, აპირებს ისარგებლოს კიევში შექმნილი პოლიტიკური კრიზისით და საკუთარი შეხედულებების დაწინაურებას შეეცადოს, - წერს ფრანგული გაზეთი Le Monde-ი სტატიაში სათაურით ანდრიი იერმაკის გადადგომამ ევროპაში შოკი გამოიწვია, თუმცა შეერთებულ შტატებს აწყობს.

„უკრაინის სახელმწიფოს მეთაურთან ამ დაახლოებული პირის გადადგომა, რომელიც მის ნამდვილ „პრემიერ-მინისტრად“ მიიჩნეოდა, ბოლო დღეებში წარმოუდგენელი იყო, რადგან მისი ჩანაცვლება ზელენსკის ადმინისტრაციის დესტაბილიზაციის გარეშე თითქმის შეუძლებელი ჩანდა“, - ნათქვამია სტატიაში.

ევროპაში ანდრიი ერმაკის გადადგომამ განცვიფრება გამოიწვია. პოლონეთის პრემიერ-მინისტრის, დონალდ ტუსკის თქმით, კიევის პოლიტიკური კრიზისი „ფატალური კომბინაციაა“. ევროკომისიამ პარასკევს საღამოსვე მოახდინა რეაგირება და იძულებითი გადადგომის დადებითი მხარის დანახვა სცადა. „მიმდინარე გამოძიება აჩვენებს, რომ უკრაინაში ანტიკორუფციული უწყებები არსებობს და უფლებამოსილია, იმოქმედოს“, - კომენტარი გააკეთა ევროკომისიამ.

ბრიუსელის აღმასრულებელი ხელისუფლება და, ზოგადად, კონტინენტის დედაქალაქები არ აპირებენ, შეაჩერონ უკრაინის მხარდაჭერა კორუფციული სკანდალის გამო, რომელიც მის რეპუტაციას ჩრდილს აყენებს, მით უმეტეს მაშინ, როდესაც კიევის ხელისუფლება სულ უფრო არასტაბილურ მდგომარეობაშია - ის განიცდის ერთობლივ ზეწოლას: სამხედრო ფრონტზე რუსეთის მხრიდან და დიპლომატიურ ასპარეზზე ამერიკის შეერთებული შტატების მხრიდან.

იმ დროს, როდესაც ევროკავშირი უკრაინისთვის დაახლოებით 140 მილიარდი ევროს სესხის გამოყოფას განიხილავს, რომელიც გაყინული რუსული აქტივებით არის უზრუნველყოფილი, ეს საქმე შესაძლოა კიდევ უფრო ართულებდეს დებატებს, რომლებიც ამ ეტაპზე ბელგიის მიერ არის დაბლოკილი.

ზოგიერთი ოფიციალური პირი ასევე შიშობს, თუ რა გავლენას მოახდენს ეს მოვლენები უკრაინის პოლიტიკურ სტაბილურობაზე. ანდრიი ერმაკის გადადგომის შემდეგ, ისინი იმედოვნებენ, რომ პოლიტიკური ბრძოლა, რომელიც შესაძლოა კიევში გამწვავდეს, კიდევ უფრო არ დაასუსტებს ვოლოდიმირ ზელენსკის.

„ანდრიი ერმაკის გადადგომა, ევროპელების მსგავსად, ამერიკის შეერთებულ შტატებსაც ართმევს მოლაპარაკებებში ძალიან ნაცნობ თანამოსაუბრეს. თუმცა, ვაშინგტონში მას არავინ ინანებს. პირველი მიზეზი, რომელიც საჯაროდ არ არის აღიარებული, მდგომარეობს ტრამპის ადმინისტრაციის ოპორტუნისტულ სურვილში, ისარგებლოს კიევის პოლიტიკური კრიზისით. დონალდ ტრამპის გარემოცვაში მიიჩნევენ, რომ კორუფციის ეს სკანდალი გზას უხსნის იმას, რომ ვოლოდიმირ ზელენსკი დათანხმდეს დონეცკის ოლქში ტერიტორიების დათმობას და სხვა უპრეცედენტო ნაბიჯებს“, - აღნიშნულია სტატიაში.