ლატვიის სამხედრო დაზვერვისა და უსაფრთხოების დირექტორმა, ინდულის კრეკისმა ადგილობრივ მედიასთან ინტერვიუში განაცხადა, რომ სანამ რუსეთი უკრაინაში ომობს, ლატვიის საზღვრებთან სიმშვიდე იქნება.

„ლატვიისთვის რეალური სამხედრო საფრთხის არსებობის შემთხვევაში საზღვრისპირა ზონაში ჯარისა და სამხედრო ტექნიკის კონცენტრაცია თვალსაჩინო იქნებოდა. სანამ რუსეთი უკრაინაში ომობს, ჩვენს საზღვრებთან შედარებით სიმშვიდე იქნება“, - თქვა კრეკისმა.

მისი თქმით, თუ უკრაინაში ომი რუსეთის სასარგებლოდ დასრულდება, ან კონფლიქტი გაიყინება, სიტუაცია საზღვრებთან უარესობისკენ შეიცვლება. სამხედრო საფრთხე ლატვიისთვის გაიზრდება, რადგან რუსი ჯარისკაცები დისლოკაციის ადგილებს, მათ შორის, ლატვიის საზღვართან დაბრუნდებიან.