ადგილობრივი მედიის ცნობით, სამხრეთ-დასავლეთ კოლუმბიაში ბომბებითა და იარაღით თავდასხმებს, სულ მცირე, შვიდი ადამიანი ემსხვერპლა. ქვეყნის სიდიდით მესამე ქალაქ კალზე და რამდენიმე მიმდებარე ქალაქზე განხორციელებული თავდასხმების შედეგად დაღუპულთა შორის ორი პოლიციელი იყო. დაშავებულთა რიცხვი 28-დან 50-მდე მერყეობს.

კოლუმბიის თავდაცვის სამინისტროს ცნობით, 19 თავდასხმა განხორციელდა. ბომბები დამონტაჟებული იყო ავტომობილებსა და მოტოციკლებში. ასევე გამოყენებული იყო დრონი. დაბომბილია პოლიციის განყოფილებები, მუნიციპალური შენობები და სამოქალაქო ობიექტები. ადგილობრივი მედია თავდასხმების ნაწილს კოლუმბიის რევოლუციური შეიარაღებული ძალების ფრაქციას უკავშირებს. BBC-მ აღნიშნული ინფორმაციის დამოუკიდებლად დადასტურება ვერ შეძლო. 

კოლუმბიის თავდაცვის სამინისტრომ ძალადობრივი ინციდენტი შეაფასა, როგორც „არალეგალური შეიარაღებული დაჯგუფებების თავზეხელაღებული რეაქცია [სამხედროებისა და პოლიციის] მასშტაბურ ოპერაციებზე, რომლებმაც გაანადგურა მათი უკანონო სტრუქტურები და ეკონომიკა“.

ქალაქ კალის მერმა განაცხადა, რომ ქალაქი 1989 წელს დაუბრუნდა, როდესაც ის ნარკოტიკებით ვაჭრობამ და კარტელების ძალადობამ გაანადგურა.

თავდასხმები დედაქალაქ ბოგოტაში, პრეზიდენტობის კანდიდატ მიგელ ურიბე ტურბაის მკვლელობის მცდელობიდან რამდენიმე დღეში განხორციელდა, როდესაც ის მხარდამჭერებს სიტყვით მიმართავდა. შემთხვევის ადგილზე 15 წლის მოზარდი დააკავეს. 10 ივნისს, გენერალური პროკურორის ოფისმა განაცხადა, რომ მოზარდი არ აღიარებს მის წინააღმდეგ წაყენებულ ბრალდებებს, მათ შორის მკვლელობის მცდელობას და ცეცხლსასროლი იარაღის უკანონო შენახვას. მოსამართლემ მოზარდის დაკავების ბრძანება გასცა.