შალვა პაპუაშვილმა მედიის წარმომადგენლებს თხოვნით მიმართა, 100 მეტრის მიღმა არ შეაწუხონ მოქალაქეები, რადგან მისივე თქმით, მედიის მხრიდან რამდენიმე საარჩევნო უბანთან აჟიოტაჟის გამოწვევა დაფიქსირდა:

„ზოგადი შეფასების სახით მინდა გითხრათ, რომ რასაც ჩვენ ვაკვირდებით არის ერთი ტენდენცია, რაც გამოიკვეთა, რომ განსაკუთრებით მედიის მხრიდან აჟიოტაჟის გამოწვევა უბნებთან. ვხედავთ სხვადასხვა მედიასაშუალებებს, როგორ დასდევენ სხვადასხვა მოქალაქეებს უბნებთან, უბნისგან მოცილებით. ორი საკითხია აქ მნიშვნელოვანი. პირველი, იცით რომ საარჩევნო რეფორმის შედეგად შემოღებულ იქნა 100 მეტრიანი შეზღუდვის რადიუსი, აქედან გამომდინარე მედიის წარმომადგენლებს მინდა ვთხოვო, 100 მეტრის მიღმა არ შეაწუხონ მოქალაქეები, იქნებიან ეს პარტიული აქტივისტები, ამომრჩევლები, უბრალო მოქალაქეები. არსებობს 100 მეტრიანი რადიუსი და ყველამ როგორც მოქალაქეებმა, ისე მედიამ უნდა ვცეთ ამ რადიუსს პატივი. 100 მეტრის იქით ყველას აქვს უფლება, მათ შორის შესაძლებლობა არის, რომ მოახდინონ ამომრჩევლების მობილიზება. ამიტომ, კიდევ ერთხელ ყველას მოვუწოდებ, მედიის წარმომადგენლებს 100 მეტრის მიღმა ნუ შეაწუხებენ მოქალაქეებს,“ - აღნიშნა პაპუაშვილმა.

შალვა პაპუაშვილმა ამ დროისთვის დაფიქსირებულ დარღვევებზე დეტალურად ისაუბრა და განაცხადა, რომ მოსახლეობას დამატებით ინფორმაციას პერიოდულად მიაწოდებს.

აგრეთვე, შალვა პაპუაშვილი „ნაციონალური მოძრაობის“ წარმომადგენლის ანა წითლიძის ბრიფინგს გამოეხმაურა, სადაც წითლიძე კერძო კომპანია „ვეგასის“ წარმომადგენლებზე საუბრობდა, რომლის თანახმად მათ დავალებული აქვთ გარკვეული კარუსელის მომზადება. შალვა პაპუაშვილმა აღნიშნული ინფორმაცია უარყო და განაცხადა, რომ ამ ადამიანებს საარჩევნო დღესთან და „ქართულ ოცნებასთან“ არანაირი კავშირი არ აქვთ:

„რაც შეეხება ჩვენს მონაცემებს და ჩვენი პორტალიდან მონაცემებს, ამ დროისთვის დაფიქსირდა ორი ინციდენტი, ერთი ფოთში და მეორე ზუგდიდში, ორივე ამოწურულია. ჩვენ ინციდენტების სახით ვაფიქსირებთ ძალადობის ან არეულობის ინციდენტებს, როდესაც მეტ-ნაკლებად ხმაური არის ხოლმე. ამჟამად არის მარნეულში ინციდენტი, სადაც „ნაციონალური მოძრაობის“ შტაბის ხელმძღვანელი პროვოკაციულად მიეჭრა ზაურ დარგალს და იქ არის ინციდენტი, მაგრამ ვფიქრობ, რომ ესეც მალე ამოიწურება. რაც შეეხება სხვადასხვა დარღვევას, რომელიც ჩვენ დავაფიქსირეთ, თბილისში, ნაძალადევის რაიონში, 32-ე უბანზე საარჩევნო ყუთის ზედამხედველს დემონსტრაციულად ტელეფონზე ჰქონდა მიხეილ სააკაშვილის სურათი და ედო მაშინ, როდესაც ამომრჩევლები აძლევდნენ ხმას, რაც შეიძლება ჩაითვალოს როგორც აგიტაცია. ქობულეთში, მე-6 საარჩევნო უბანზე „ნაციონალური მოძრაობის“ ქობულეთის მაჟორიტარობის კანდიდატი რამაზ გოხიძე დგას უბანზე დისტანციის დარღვევით. ბათუმში, მე-60 საარჩევნო უბანი „ნაციონალური მოძრაობის“ კოორდინატორი უბანთან სიებით ამომრჩეველს აღრიცხავს. დაფიქსირებულია როგორც ეს ადამიანი, ისე მანქანა და მანქანის ნომერი. ჩოხატაურში, ხევის 34-ე საარჩევნო უბანში, 30 მეტრის რადიუსში იმყოფებოდა „ნაციონალური მოძრაობის“ მაჟორიტარობის კანდიდატი ჯემალ ბერიძე. წეროვანში, მე-40 უბანზე „ნაციონალური მოძრაობის„ აქტივისტი გია ჩიტიშვილი არღვევს 100 მეტრიანი რადიუსის განაწესს. ბათუმში, 64-ე უბანზე, „ნაციონალური მოძრაობის“ აქტივისტები სიებით ამომრჩეველს აღრიცხავენ. ესეც გახლავთ დარღევა უბანთან ახლოს. ბათუმში, მე-60 უბანზე, „ნაციონალური მოძრაობის“ აქტივისტი სიებით ამომრჩეველს აღრიცხავს. თბილისში, ისანში, 39-ე და 45-ე უბანზე, „ევროპული საქართველოს“ კანდიდატის დაბრენდილი მანქანებით მოძრაობენ, ჩერდებიან უბანთან, რაც ასევე შეიძლება ჩაითვალოს როგორც აგიტაცია.

გარდა ამისა, ჩვენ შემოგვივიდა ინფორმაცია, რომ ლანჩხუთში ხიდმაღალას 21-ე უბანზე ავთანდილ მანჯგალაძე აცხადებს, რომ მან გამოიტანა ორი ბიულეტენი. ჩვენ ვცდილობთ, რომ დავადგინოთ შეეფერება ეს თუ არა სინამდვილეს. ამას გარდა, ქალბატონმა ანი წითლიძემ ჩაატარა ბრიფინგი, როგორც იცით, სადაც ის საუბრობდა კერძო კომპანია „ვეგასის“ წარმომადგენლებზე, რომ თითქოს დავალებული აქვთ გარკვეული კარუსელის მომზადება და ა.შ. კატეგორიულად ვაცხადებთ, არანაირი კავშირი ამ ადამიანებს და საარჩევნო დღესთან და ჩვენთან არ აქვთ. აქედან გამდინარე რაიმე სახით ჩართული და მით უმეტეს კარუსელთან, რომელიც მთელმა საქართველომ იცის, რომ ზღაპარია საერთოდ ამაზე საუბარი, როგორც წინა არჩევნებზე ცდილობდნენ ამის დამტკიცებას და ყველა დარწმუნდა, რომ ეს იყო აბსოლუტური ფალსიფიკაცია ასეთი ტყუილების გავრცელება. ასე რომ, ესეც კატეგორიულად გვინდა უარვყოთ. ასე რომ, ეს არის ამ მომენტისთვის ჩვენს მიერ დაფიქსირებული დარღვევები და ჩვენ დროდადრო მოგაწოდებთ დამატებით ინფორმაციას“, - განაცხადა შალვა პაპუაშვილმა.