ეროვნული უსაფრთხოების საკითხებში აშშ-ის პრეზიდენტის მრჩეველი ჯეიკ სალივანი 27-29 აგვისტოს ჩინეთს ესტუმრება. ინფორმაციას Axios-ი ავრცელებს.

ჩინეთში სალივანი ქვეყნის საგარეო საქმეთა მინისტრს ვან ის შეხვდება. გამოცემა ვარაუდობს, რომ სალივანი და ი აშშ-ის პრეზიდენტის ჯო ბაიდენის და ჩინეთის ლიდერის სი ძინპინის შეხვედრას მოამზადებენ, რომელიც წელს უნდა შედგეს.

გამოცემის ცნობით, მას შემდეგ, რაც ბაიდენმა წინასაარჩევნო საპრეზიდენტო კამპანია შეწყვიტა, მან გადაწყვიტა, რომ უფრო მეტი დრო საგარეო საქმეებს, მათ შორის საერთაშორისო ვიზიტებს უნდა დაუთმოს.

სავარაუდოდ, ბაიდენი და სი ძინპინი მას შემდეგ, რაც ნოემბერში აშშ-ში საპრეზიდენტო არჩევნები ჩატარდება, „დიდი ოცეულის“ სამიტში მიიღებენ მონაწილეობას, რომელიც ბრაზილიაში უნდა გაიმართოს.