იტალიის სამხრეთ სანაპიროებთან მიგრანტებით სავსე ორი ნავი ჩაიძირა. ამის შესახებ ინფორმაციას Reuters  ავრცელებს სანაპირო დაცვასა და გაეროს სააგენტოზე დაყრდნობით. ბოლო ცნობებით, ნაპოვნია 11 ადამიანის ცხედარი, ხოლო 60-ზე მეტი მიგრანტი, მათ შორის 26 ბავშვი, დაკარგულად ითვლება.

ორგანიზაცია RESQSHIP, რომელიც სანაპირო დაცვას უწევს დახმარებას, აცხადებს, რომ ჩაძირული ხის ნავის გემბანზე 10 ცხედარი დახვდათ, ხოლო 51 ადამიანის გადარჩენა შეძლეს - მათ შორის ორი, უგონო მდგომარეობაში იმყოფებოდა.

როგორც გაეროს ლტოლვილთა სააგენტო UNHCR, მიგრაციის საერთაშორისო ორგანიზაცია და გაეროს ბავშვთა სააგენტო UNICEF ერთობლივ განცხადებაში აღნიშნავენ, ნავი ლიბიიდან დაიძრა და მას სირიელი, ეგვიპტელი, პაკისტანელი და ბანგლადეშელი მიგრანტები გადაჰყავდა.