ქვეყანაში ვითარება იმდენად დაიძაბა, იმდენად დაჩქარდა ყველაფერი, რომ შეუძლებელია, სტანდარტული პასუხი იყოს ადეკვატური პასუხი, – ასე უპასუხა „ნაციონალური მოძრაობის“ წევრმა, ირაკლი ფავლენიშვილმა საქართველოს პირველი არხის გადაცემაში „დღის თემა“ წამყვანის შეკითხვას, რა არ მოეწონა სალომე ზურაბიშვილის მიერ 31 მარტის გამოსვლისას გაჟღერებულ გეგმაში.
„ბოლო თვეების განმავლობაში არა ერთხელ ვიხილეთ ქალბატონ სალომე ზურაბიშვილისგან საკმაოდ საინტერესო და მათ შორის, სწორი აქცენტებით გამოსვლები, თუმცა ბევრ საკითხთან დაკავშირებით არსებობდა კითხვები. ისედაც ყველამ ვიცით, რომ მათ შორის, არც სალომე ზურაბიშვილს ეხატება დიდად გულზე „ნაციონალური მოძრაობა“ და არც „ნაციონალურ მოძრაობას“ ეხატება დიდად გულზე სალომე ზურაბიშვილი, თუმცა ტაქტიკურ, სტრატეგიულ თემებზე გვაქვს ამ შემთხვევაში საუბარი და არა წარსულის, ან თუნდაც დღევანდელობის მსოფლმხედველობრივ, თუ პოლიტიკურ საკითხებზე“, – განაცხადა ფავლენიშვილმა.
მისი თქმით, როდესაც ქვეყანაში ქართველ სამხედროებს და პოლიტიკური თანამდებობის პირებს 2008 წელს ქვეყნის დაცვისთვის ასამართლებენ, ამით პუტინს დიპლომატიური მანევრირების საშუალებას უქმნიან და ამ ყველაფრის ფონზე სალომე ზურაბიშვილის გამოსვლაში ეს საკითხები არ არის აქტიურად წარმოჩენილი, ან უახლოეს დღეებში დაანონსებული არ არის აქციები და ისევ დიდი პლატფორმის, თუ დიდი კოორდნაციის საბჭოზეა საუბარი, ეს გაუგებარია.
„ისედაც ყველა ერთად ვართ, ისედაც ყველა ერთ ნავში ვსხედვართ და ისედაც ვიკრიბებით ხოლმე, ამის პრობლემა არ არსებობს“, – განაცხადა ფავლენიშვილმა.
წამყვანის შეკითხვაზე, იცოდა თუ არა მანამდე ოპოზიციამ, რის თქმას აპირებდა სალომე ზურაბიშვილი და იყო თუ არა შეთანხმებული მისი გამოსვლა, თუ დაახლოებითი გზავნილები, ირაკლი ფავლენიშვილმა განაცხადა, რომ მათ ზუსტად ტექსტი არ იციან, რადგან სალომე ზურაბიშვილი არ იძახის ხოლმე.
„წინა დღეების მანძილზე, რა თქმა უნდა, ჩვენ გვქონდა მათ შორის, გამოსვლები, რომელიც კრიტიკულად იყო შეფასებული და ასეც იყო, კრიტიკული გამოსვლები გვქონდა. იმიტომ, რომ დაახლოებით ვიცოდით, რას აპირებდა სალომე ზურაბიშვილი, რადგან ჩვენ გვაქვს მუდმივი კოორდინაცია. ასე გამოვიდა, რომ მან არ გაიზიარა შენიშვნები“, – განაცხადა ფავლენიშვილმა.
თამთა სანიკიძის შეკითხვაზე, დისტანცირდება თუ არა „ნაციონალური მოძრაობა“ ნელ-ნელა ყოფილი პრეზიდენტის ლიდერობით მიმდინარე შეხვედრებიდან, რადგან მაგალითად, გუშინ ამ პლატფორმის შეხვედრაზე არ მისულან და ივლიან თუ არა ამ შეხვედრებზე, ირაკლი ფავლენიშვილმა განაცხადა, რომ ამ შეხვედრებზე იყვნენ მათი კოალიციური პარტნიორები და მათ აქვთ სრული ინფორმაცია, რა ხდებოდა ამ შეხვედრებზე.
„ამიტომ, როცა ქუჩაში იქნება მნიშვნელოვანი აქტივობა, იქ მაინც ყველანი ერთად ვიდგებით. შეხვედრებზე ვივლით, ამაზე პრობლემა არ გვაქვს, და ბოიკოტიც არ გამოგვიცხადებია, უბრალოდ, არის რაღაც შეხვედრები, სადაც მიხვალ და სადაც არ მიხვალ“, – განაცხადა ფავლენიშვილმა.
1
1
