“რა თქმა უნდა, ჩვენ ვამცირებთ ჩვენს მარაგებს, არსებობს მხოლოდ ერთი გრძელვადიანი გამოსავალი - მეტი უნდა ვაწარმოოთ”, - ამის შესახებ ნატო-ს გენერალურმა მდივანმა, იენს სტოლტენბერგმა ევროკომისიის პრეზიდენტთან, ურსულა ფონ დერ ლაიენთან და ევროპული საბჭოს პრეზიდენტთან, შარლ მიშელთან გამართულ საერთო პრესკონფერენციაზე განაცხადა.

გენერალურმა მდივანმა ასევე აღნიშნა, რომ ალიანსის წევრი სახელმწიფოების თავდაცვის მინისტრები შემოდგომაზე იარაღისა და საბრძოლო მასალის მარაგების გაზრდაზე შეთანხმდნენ.

“მიზანი იმაში მდგომარეობს, რომ უკრაინისადმი დახმარების გაგრძელება და ასევე გაზრდა შეგვეძლოს. ვინაიდან, ჩვენ ვნახეთ, რომ რუსეთმა უკრაინაში დიდი დანაკარგები განიცადა უკრაინელი ჯარისკაცების სიმამაცისა და უკრაინის შეიარაღებული ძალების პროფესიონალიზმისა და განწყობის გამო”, - თქვა სტოლტენბერგმა.

ნატო-ს გენერალურმა მდივანმა ასევე აღნიშნა, რომ, მისი აზრით, უკრაინაში რუსეთის დანაკარგები სრულმასშტაბიან ომს არ შეაჩერებს, ვინაიდან, რუსეთის ხელისუფლება მზადაა ასეთი დანაკარგებისთვისა და ომის გაგრძელებისთვის.